Convenzion: Olà é pa i ladins?

La Convenzion à organisé dai 3 ai 6 de mei a Bulsan na seria de discuscions y workshops sun tematiches desvalives liedes a la reforma dl Statut de Autonomia. L fin de chestes encontedes fova de abiné adum idees y propostes dles lies y

assoziazions, dla enscì dita “sozieté zivila organiseda”; i resultac de chestes discussions, adum con chi di ’Open spaces’, dess dé ca la basa per i laours dl Forum di 100 y dla Convenzion di 33. I temesc di workshops fova dés dant “dal aut”; vigni union podova se scrive ite ma podova tò pert a nia plu de doi workshops. Ti protocoi di workshops végnel a lum n valgugn punc che me per de enteres per i

ladins.

1. Tipologia dles lies: La maiour pert dles passa sessanta organisazions che à tout pert ai workshops é todesces y dolarata truepes de chestes é liedes ai scizeri (sciche bele tla ronda di ‘Open spaces’). Dret pueces é les lies talianes y demé trei é cheles ladines; i talians é plutost raprejentés te organisazions che i podessan definì interetniches o interculturales. Les organisazions economiches mancia daldaut. Perchel él rie da dì che les lies che à tout pert ai workshops é raprejentatives dla sozieté de Südtirol.

2. Temesc: Sce an ti ciala ai capitui “Propostes comunes de duc i partezipanc” pòn vedei che les tematiches y les ghiranzes “todesces” y “tiroleises” é dominantes, sciche: dert de autodeterminazion, los von Trient und von Rom, liam politich y cultural con (Nord)tirol, eventualmenter tres na Euroregion, promozion de na coscienza “tiroleisa”, aplicazion strenta dl propoz, dl bilinguism, dla scola todescia, defascistisazion dla toponmastica, etc. De ghiranzes “talianes” ne él praticamenter nience l’umbria y les propostes de reforma preveid scialdi demé na realté taliana-todescia o plu avisa todescia-taliana; i ladins vegn plu o manco desmentiés. Enteressant él ence che l’economia vegn daldut lasceda su na pert tamben dai organisadours che dai partezipanc di workshops. N segn che duc se sta ben te Südtirol?

3. Partezipazion di ladins: L’organisazion di workshops prevedova anter l auter n grup de laour “La sconanza dles mendranzes” y n workshop sun “L grup linguistich ladin”. Chisc temesc essa perdret messù enteressé dassen i ladins ma demé trei grups à tout pert a la discuscion: la Compagnia di scizeri da Urtijei, l Grup di Jogn Al Plan y la Comunanza ladina a Bulsan che à ence prejenté n sie “position paper”. L prof. Paul Videsott fova vegnù envié a splighé la situazion di ladins aldò dl Statut atual y tl davegnì. La partezipazion de chestes organisazions é samben da laudé ma al é ence da dì che ales é puech raprejentatives dla sozieté ladina. Ma an mess dantaldut se damané: Olà fova pa la Union di Ladins? Ne é nia la sconanza dla mendranza ladina, de sie lingaz y de sia cultura, l fin essenzial, la “raison d’être” dla Union di Ladins? Ne àla nia da dì, o se conténtela con cie che i on y ti lascia ad autri de dezidé coche la mendranza ladina dess vegnì trateda tl Statut nuef?

4. Ghiranzes ladines (aldò dl protocol dl workshop “L grup linguistich ladin”): Les ghiranzes portedes dant dai partezipanc y dandaldut da Ivan Lezuo a inom dla Comunanza ladina a Bulsan y dal prof. Paul Videsott va tla dreta direzion y ales corespon almanco en pert a les ghiranzes contegnudes tl “Memorandum ladin”. La reunificazion de Souramont con Südtirol, la creazion de n raion lital per l consei provinzial, la creazion de na “comunité ladina” con competenza per la scola, la cultura y l lingaz ladin, l’adoranza dl lingaz ladin ence fora dal teritore ladin, é ghiranzes essenziales dla mendranza ladina che dess vegnì toutes su tl Statut nuef de Autonomia y eventualmenter tl statut dla Euroregion. Ma les “propostes comunes de duc i partezipanc” (cheles che ti vegnirà ortiedes a la Convenzion di 33) é, aldò dl protocol dl workshop, plutost  generiches y debles: la ghiranza de reunificazion sciche dla creazion na de comunité ladina autonoma toma demez, l dert di ladins de sourantò

enciaries autes ence soura l proporz fora y la colaborazion anter les valedes ladines é ghiranzes minimalistiches; per cheles ne adòren deguna reforma dl Statut.

Conclujion: L enteres di ladins – dles lies y di media – per i laours dla Convenzion per debl y debles é ence sies propostes de reforma per l Statut. Ciuldì pa? Puecia creta tla Convenzion, apatia politica, o é duc contenc con la situazion atuala? Rie da dì, ma na bela situazion ne é chesta nia; depierpul che i autri ghira tres deplù derc, dà i ladins enstesc da capì che ai é na “entité da podei desmentié”.