Plan de Corones deventa Kronplatz

La documentazion sun l toponim Plan de Corones (Usc 10.02.17) é dassen enteressanta y ie son ence a una con dut, fora dla minonga che l plurilinguism di inoms sibe n arichiment dla sozieté moderna; de valch vers pòl ence ester, ma per l lingaz y l’identité de na popolazion de mendranza arati che l pericul de perde l inom original y sie sibe maiour.  Scenò me temi me che ence les moiures spligazions scientifiches (che ie ti lasce samben me ai esperc) ne sibe nia bones da mudé plu de tant certes regoles y speculazions dl marcé y, cie che fossa ciamò plu emportant, l raport danter i valours dla vita y dla sozieté.

Les gaujes di inoms folestiers ite per la Ladinia conescionse plu o manco adamentes:  preparazion massa debla, massa puecia coscienza y ligreza con l nost, minonga de fé plu afars (la Val d’Aosta, che n’é nia plu scleta de nos, adora me la toponomastica franzousa), dlonch te organisazions forestes, l trilinguism ence di inoms, mancianza dla dreta sconanza di toponims y dl lingaz ladins,

… les conseguenzes vedonse o vedaronse damprovia; do i mescedoc y la pecugna tres maioura de paroles y de frases da mete adum vegn l pericul dl arbandon. Mo sc’i piasson via da les dretes premisses storiches y da les dretes condizions giuridiches podessanse stravardé y varenté cotant de val‘. Ne fova nia n iade l teritore retoroman o ladin grandiscim, senté ite danter Rain y Adria y danter Donau y Po? Sonse bogn da capì che i ladins é i ultims conservadours de na cultura de 2000 agn vedla? Chest pensier da soul messessa nes sforzé da cialé dles ultimes trei isoles linguistiches  ladines.  Ne fova n iade nia i toponims duc ladins y chi foresc’ gnus damprovia fora dal aparat statal y politich y samben ence dai raporc economics?  Ne é i ladins nia gnus sburlés zeruch  tles valedes da encuei, lascian endò n grum de inoms ladins de paisc, frazions, raions ,pres… ence fora dles valedes ladines? Ne é nia la jent dai comuns ladins da encuei tla provinzia de Bulsan ciamò declareda al 92,11 % ladina? Ne é l inom ladin nia l simbol plu dlongia y plu sterch dla identité y unité popolara, l testemone plu vif dla storia y l element zentral dl lingaz y dla cultura?

Do chest apel al sentiment volessi dì valch sun la sconanza di toponims ladins. L tema é dassen atual ajache leges nueves sun la toponomastica aspeta de gnì aprovedes a Bulsan y a Roma. La stampa locala scriv vigni di sun l argoment mo no che ala publicassa n iade la proposta de norma de atuazion. Da cie che an à podù lieje sun i foliec vàla de listes de inoms talians y todesc; de chi ladins ne rejónen nia o ne auden nia. Speron che al ne vegne nia tout demez toponims ladins, ajache an i arata inoms talians de na mendra valuta. Cler él che la lege a Roma contegn ence d’autres cosses dassen emportantes per i ladins. Danter l auter vuelen regolé l comité cartografich a na moda che al sibe laprò 2 talians, 2 todesc y 2 ladins . I ladins essa endere me na funzion de osservadours  zenza dert de ousc. Bela roba, con inoms y esonims ladins soura duta la provinzia! Te n sotcomité per i inoms tles vals ladines ruvassa ite 2 ladins, 1 n talian y 1 n todesch. Per i ladins él dassen emportant che la norma de atuazion prescrive la parité sostanziala di grups tl comité cartografich provinzial y la maioranza cualificheda pro les dezijions tla sotcomiscion ladina. Laprò speronse che al vegne prescrit l acertament di esonims ladins (inoms ladins per luesc foradecá); che al ti vegne dè la prezedenza al inom ladin tl teritore ladin; che al ne vegne nia fat traduzions che falsificheia o strabaceia l inom o l lingaz ladin; che al vegne mantegnì la microtoponomastica  (toponims de mendra emportanza ) me per ladin. Con chestes prescrizions podessanse ciafé na mioura sconanza bele voluda dal prum statut de autonomia dl 1948.