Carlo Willeit.
En general pon dì che al é sté na bona ocajion per mete sun meisa i problems di ladins y da se confronté con i autri grups y con la politica. An messa ence ti reconesce la bona volenté a chi che é stés pro meisa di 100 y di 33 per i ladins che l’à dampruma inant abuda ria da se fé avalei; entant de consens ài ence arjont i ladins ma ciamò n iade ései gnus sforzés ite te na ciameija che ne é nia la sia; i ladins ne à nia me rejons tla provinzia autonoma de Bulsan, ma ai à ence l dert de gnì reconescius soura i confins dles provinzies y regions fora. L resultat di laours é gnù trat adum tl at final dla comiscion di 33 y é tomé fora, do mia minonga, plutost megher. Te chesta seconda comiscion, plu strenta y plu politica àn scialdi me rejoné dla forma y dimenscion dla autonomia, di raporc dla provinzia con l stat y con la UE, dla segurté internazionala, dles competenzes y finanzes dla provinzia y da l’autra pert puech dal raport danter autonomia y popolazion, di derc y dl bensté sozial y economich di zitadins. Ciamò n iade àn dit che duc à i medems derc, ma an à lascé les vedles regoles con derc desvalifs.
Danpertfora
Danfora ai laours dles comiscions provinziales é judes propostes, ben laoredes fora y cualifichedes, de Erwin Valentini, de Lois Trebo y dla Union Generela di Ladins dla Dolomites con l sostegn dla Lia di Comuns ladins che tolova ite n pue dutes les esperienzes y reclamazions di ultims 50 agn.
Chestes propostes spligova y scrivova ju te za 20 punc i debujegns di ladins dolomitans da Bulsan y deberieda con chi da TN y BL desfarenzian danter rejons politiches y giuridiches, rejons de lingaz y de cultura, rejons soziales y economiches y ghiran dantdadut la unificazion con Souramont tla region Trentin-Südtirol, l coordinament danter BZ y TN y l reconesciment y tratament desche mendranza nazionala. TN y BZ é judes vignuna do sie troi, ne à coordiné, cie che ie sé net nia, y mies informazions sun les comiscions de Trent éi me fora dla USC di Ladins.
Consens per i ladins
Stan pro la convenzion de Bulsan à la comiscion di 100 araté bones y aproé 10 propostes emportantes tratant che la comiscion di 33 en à me plu aproé 3 con does papes de consolazion laprò. Na lezion emportanta podonse se tò fora da chesta desferenzia: “dla popolaziun ladina, taliana y todescia che se spidlova tla comiscion leria con trueps ence nia politics ciafa i ladins stima y consens, da la politica raprejenteda tla comiscion di 33 ne ciafa i ladins no l’aiut no la consciderazion che ai adorassa.“
I 100 à dit de scì a: 2 aconsiadours, al ladin pro l TAR, a la daurida dl proporz, a lingaz scrit unifiché, lia di comuns ladins, sistem de formazion, ladin tles scoles foradecà, trilinguism y indenité, Souramont pro BZ, mendranza ladina;
i 33 é a una con: parité de lingaz ladin tles vals, ladin pro l TAR y plataforma per la comunité ladina. N auter punt é tla lege Alfreider. La bona volenté da valorisé i ladins y da daidé Souramont sona da consolazion.
Ie volesse me ti cialé plu avisa a valch punc critics, deplù per i ladins ma combatus dandadut danter talians y todesc.
Autodeterminazion y unité di ladins
Ghiré la autodeterminazion (cie che vuel me dì valch deplù che l’autonomia) per la mendranza todescia y nia aproé zenza resserves l’unité danter i ladins o dì jì contra i ladins ; i ladins é mendranza a la pèr di todesc y l’autodeterminazion do l dert internazional ti speta tamben a d’ei. Ma destaché, unfat te cie moda, la provinzia de Bulsan da la region y dal stat, zenza denant unì i ladins volessa dì i despartì y i sotmete defin. Recordé messonse ence che l’autonomia de Südtirol à metù man con l’unificazion dl teritore todesch.
Souramont
L referendum di trei comuns ladins da ruvé pro Südtirol é metù a dormì y la convenzion se tira sotfora con la vertola da dagnora: “ l stat, Roma messa fé inant!” Che les provinzies autonomes y la region Trentin-Südtirol messa ence dì la sia y che chestes à si raprejentanc tl Parlament che podessa mené inant la proposta de lege ne végnel nia conscidré. Zenza unité soziala y forza y autonomia culturala à i ladins n rie davegnì. Colaborazion y aiut ne se lascia gonot nience dé con regoles y strutures daldut desvalives y ne vel mai l’union.
La Region
La region Trentin-Südtirol vuelen tò ju zenza cialé al debujegn di ladins. La region é l unich cheder istituzional olache trei cherc di ladins se enconta, ma al ruva ciamò valch laprò; do la sentenza dla Court Costituzionala dl 1998 à la mendranza ladina desche comunité por se a livel regional la medema garanzia internazionala desche i autri à. I ladins mess conservé la comunité y la segurté.
Toponomastica
La convenzion à schivé l argoment mo al é cler che al mess ruvé ite tl statut con la prejenza che i ladins se ghira. La prejenza storica y atuala dla toponomastica ladina, nia me tl raion ladin mo tla provinzia entiera é clera. I esonims – inoms ladins fora dal raion ladin – deida recordé la storia y mantegnì la lerch culturala y politica di ladins.
La scola
Ence chest tema àn n sich schivé. Per dut Südtirol sarà l art. 19 che regoleia les scoles dant o do da scrive da nuef. Truepes scoles é bele fora dal cheder de lege. Per i talians vàla dl plurilinguism, per i todesc da mantegnì l monolinguism, per i ladins da crié la dreta lerch al ladin.
Che tl sistem dl’autonomia é l lingaz dla oma la seva dles rejons y poscibeltés é cler. Tres la reforma dla scola che tol ju les intendenzes podessa ence s’en jì l’autonomia dla scola.
L lingaz
Chi che ne vuel nia l’unité di ladins ne vuel ben nience l lingaz ladin scrit unifiché. La comunicazion danter i ladins, l’ufizialité y i scric publics l adora, mo ence i idioms de valeda enstesc sce ai vuel vive. La sconanza culturala vegn apeina conscidreda da la comiscion di 33; enscì mancia les mesures de sostegn al lingaz, l trilinguism, l’indenité , i cursc de prepararazion, les massaries da emparé, adoré y controlé l lingaz ; enscì mancia l capitul di media-radio, tv, foliec y internet per ladin. L ensegnament volontar foradecà ne vegn nience aproé, nia me porciodi che an ne vuel nia la sciacaria, ma, do mia minonga, ence perciodi che an se tem che i esperimenc y la scola plurilinguala ciafe flé ence tla popolazion taliana y todescia.
Proporz
L proporz é na regola plu complicheda che reverda cenc de organs tl’aministrazion y tles sozietés publiches, l personal publich y la repartizion dles finanzes per la cultura y la ciasa . La daurida dl proporz per i ladins (che ai posse tò pert ai organs y ai concursc resservés a d’autri – l 4,5% de ladins ne ti tol nia al 70% y 20 % de todesc y taliasn ), ti caji olache ai vegn scluc fora defin, é na chestion de giustizia y de valivanza y samben de debujegn. Ence chilò val debujegn de na regola generala tl statut o tles normes de atuazion . Ciamò n iade voléssen consolé i ladins con l’empermetuda da daidé. Ciamò n iade ne vuelen nia mudé, ajache i talians se ghira ence la daurida dl proporz. En plu va la politica ence soura la regola fora.
Na plataforma deberieda per la comunité ladina dles Dolomites
La proposta é bona, ma chi che pensa a valch comiscion o consulta é sun la streda fauza. I ladins adora na plataforma de union territoriala y aministrativa, na union culturala y soziala autogoverneda con organs lités da la popolazion; chest vuel dì , n ent publich, ence na lia de comuns publica, reconesciuda dal stat, da les regions y provinzies autonomes con funzions y competenzes ben definides y reservedes. N vare d’oblianza laprò conscidrei ie l reconesciment publich dla UGLD (Union Generela di Ladins dles Dolomites). Ejempli de enc autonoms soura i confins aministratifs via en él assé, un dai ultims é l’euroregion Tirol.
La raprejentanza politica
Al é na gran desferenzia sce un é cherdé a raprejenté sia jent o sie partì. L certl lital à na gran emportanza propi desco desmostrazion dl liam danter l lité y la popolazion y en plu deidel tegnì adum la mendranza y ti dà plu forza da ghiré sies rejons. Al basta ti cialé a Fascia, a sie certl lital y a sie comun general. A BZ éssen tamben debujegn de n tel certl, cie che ne à nia da en fé con na provinzia nueva che degugn ne à ghiré te chest moment. Ma sce an rejona de raprejentanza politica ladina méssen ence tegnì cont che l dert messa ester scrit y ne speta nia a chi che se chier fora n ladin, ma a la popolazion ladina. Perchel auda l dert di ladins da ester te jonta provinziala da gnì scrit tl statut. Demé enscì à i ladins ence endoman y ence zenza SVP o autri partis de maioranza la rejon da fé pert dl govern provinzial.
Carlo Willeit
Al me plej
(13)Al ne me plej nia
(0) 3408 iadesc liet
Scrive n comentar a revert de "Convenzion, Willeit spliga"