N cristian zenza tema

I é liet con interes l articul de siour Artur Vinatzer tl ultim foliet ladin sun l ejempl de Mayr – Nusser, gnù declaré beat per avei tignù bot a la fede cristiana impede dé jorament a  Hitler.

N auter cristian zenza tema é Merch Dapunt de Badia, gnù sclopeté ai 29 d´aost 1944 a Solaneres; al ova 21 agn. Davia che al ne ova nia volù fé l saudé sot a Hitler, l ova i nazis condané a mort, sciche ence sie fre Siegfried che an ne ova nia spo sclopeté, mo sia condana a mort fova gnuda tramudeda en agn de ciamp de conzentrament (KZ). Merch Dapunt fova da cristian zenza poura contra l nazism davia che al  porsighitova  la gliejia, i prevesc, l Papa. Sot al nazism fòvel gnù martorjé y copé plu de milesc prevesc de  plu nazions, ence n valgugn de Südtirol  per gauja de sia fede che ai  ova defenù defrunt ai nazisć. Merch Dapunt fej pert de chi cristians che á azeté la mort denant che s’en desdì de sia fede cristiana. Sciche al é gnù metù su tofles de recordanza te cortines a trueps d’autri che á dé ca la vita impede dé jorament al “Führer“, se aspéten che Merch Dapunt da Sotrú a Badia vegne ence recordé da pert dla gliejia y dla aministrazion  publica con na tofla o valch relief. I todesc dij: “ Ehre, wem Ehre gebührt “ !

Lois Trebo

Vijo Alfreider fova nasciù de dezember dl 1926 a n’Antermeia y é mort ai 17 de merz dl 1945, borjé vif te fourn, tl logher de Buchenwald. Merch Dapunt fova nasciù ai 24 de merz dl 1923. El é gnù sclopeté ai 29 d’aost dl 1944 a Kortsch, na picia frazion de Solaneres. Sia sclopeteda dova ester de ”ejempl” per duc i autri che n’ess nia ulù serví l rejim nazist.

Al me plej(4)Al ne me plej nia(0)

1367 iadesc liet