No talians, no todesc

La proposta fata en chisc dis da Martin Graf (FPÖ), terz president dl consei nazional dl’Austria, de n referendum per l’autodeterminazion te Sudtirol, vuel dì la anescion a l’Austria, à scassé sotissoura la politica te Sudtirol. Al en é de chi che ti ciala a la proposta con gran simpatia, sciche la „Union “ o i „Freiheitlichen“, chi che mess se tegnì dancialà per rejons politiches y de chi che ala ne ti desplej nia, p.ej. a la SVP. La proposta de Graf ti dà samben flé nuef ai partis todesc che scombat da tres per l’autodeterminazion, Schuetzen scluc ite.

A man dreta Martin Graf (FPÖ), a man ciancia Albert Pizzinini, president de Ladins Dolomites. Te duta chesta discuscion é vegnus lascés fora i ladins, se baudia l president de LADINS DOLOMITES, Albert Pizzinini. Al é n fat che l stat talian ne à mai abù cis truep dessourora per i ladins, unfat sot a cie govern. Al basta pensé a la tripartizion aministrativa dutaorela en pé y con efec giuridics griefs: da degun reconesciment (tl Venet) pàssen a „valgamia“ reconesciment tla region Trentin-Sudtirol, en particolar tla provinzia de Bulsan, n spidiciament fatal per na picera mendranza, na ferida che „sangoneia“ dal 1918. La lege nazionala sun les mendranzes, la 482/99 (la pruma!!), é entratant vegnuda desvuededa di mesi finanziars y é perchel doprò a deventé na scuscia (crosa) doia. „Al và debujegn da dì che l tema dla autodeterminazion ne é nia n tema atual, ma al deura problematiches de nia puech cont. An veid cleramenter che te n tel caje messessa i ladins ti jì do a chela che é la maioranza al intern de Sudtirol, ence, sce poester te sie intern ne voléssei nia“, dij Albert Pizzinini, enjontan che „chest desmostra sciche i ladins adora na autonomia dezijionala per cie che reverda les problematiches che reverda ence i ladins a na moda che ai ne vegne nia sforzés da messei ti jì do a la maioranza todescia. Chilò vuelel ester na mudazion dl statut de autonomia che auze fora la posizion ladina y ti dae ai ladins plu derc da se gestì enstesc. I ladins ne é nia talians y nience todesc.“

Al me plej(0)Al ne me plej nia(1)

869 iadesc liet