Comiscion di 12 zenza n ladin

Pro les lites vegn i ladins dagnora secodis con de beles paroles y empermetudes. Pernanche chestes é do l spinel, se féjen ert da i reconesce. Chest vel ence per la comiscion di 12 che é vegnuda metuda su chisc dis. Che degun ladin ne é pro la meisa di 12 esperc a livel regional che trata damprovia chestions de atuazion dla autonomia pro meisa con l govern zentral ne ti plej nience ai funzionars ladins dla Svp, che decianta zenza a cor les bontés dl’autonomia de Sudtirol. Sen una de sies reres critiches. Christoph Perathoner dl zircondar de Bulsan, la vize- ladina Paola Bioc Gasser y i doi funzionars de valeda Stefan Runggaldier (Gherdeina) y Klaus Winkler (Val Badia) à critiché che degun raprejentant ladin ne sie laite, tant deplù che i ladins é aladò dl statut de autonomia n grup reconesciù legalmenter. Siegfried Brugger y Karl Zeller, parlamentars dla Svp tla Comiscion di 12.

La posizion de LADINS DOLOMITES sun chesta chestion tres les paroles de Albert Pizzinin é: „Bon y dret che ence la SVP Ladina tol finalmenter en consciderazion l problem prejenté da Ladins Dolomites, anter l auter da les ultimes lites provinziales, chel dla raprejentenza di ladins tla comiscion di 6 y tla comiscion di 12. Medré ne él nia la dreta maniera de ti jì permez. Jì demé a rejoné con Theiner joarà a puech, chilò méssen adoré dut l strumentar, ence con manacé da pert dl soul conseier ladin tl consei a Bulsan, Florian Mussner, de ciapé fora dla maioranza, sce al ne ti vegn nia conzedù ai ladins cie che al di speta. Sce la SVP ladina à l coraje de fé chest, ciafaràla sun chest tema l plen sostegn da pert de Ladins Dolomites, zenza vuelel dì che al se trata demé endò n iade de una dles truepes empermetudes.“ I componenc dla Comiscion di 12 nominés da pert dl govern talian é: Mario Malossini, ex president dla provinzia autonoma de Trent, on. Maurizio Fugatti (LN), Paolo Formicola, Minister di raporc con les regions, Ermenegilda Siniscalchi, Conferenza Stat-Regions, Renato Catalano, Presidenza dl Consei y Andreas Stacul, avocat da Persenon (PDL). I componenc nominés a livel regional é Siegfried Brugger y Roberto Pinter nominés dal consei regional, Diego Pintarelli y Mario Magnani nomnés dal consei provinzial de Trent y Karl Zeller y Alberto Zocchi da pert dl consei provinzial de Bulsan. La comiscion di Sis y di Dodesc à la funzion de laoré fora normes de atuazion dl statut de autonomia y é perchel una dles istituzions plu emportantes tl ciastel normatif dl’autonomia.

Al me plej(0)Al ne me plej nia(1)

863 iadesc liet