Ladins paia truepes coutes

„Che i conc ne stimeneia nia anter les coutes paiedes ite y cie che vegn endour tles valedes ladines él duc che sà“. Chest afermeia Albert Pizzinini, president de Ladins Dolomites, tolan la ocajion de mené do che al vegne realisé n valgunes infrastrutures tles valedes ladines, dantaldut per cie che reverda la viabelté. Na funzion particolara dess avei la Lia di comuns ladins de chela che an ne auda nia cis plu.

Pizzinini criticheia l deport da petlament che i ladins y i ombolc  tol ite envers les autorités provinziales. An sà che i ombolc é plu o manco „sforzés“ de ester pro l partì de maioranza; ie son 200% Svp ova dit n iade Iaco Frenademetz, ombolt de Badia. „La provinzia prova a vigni moda da fé creie, canche al vegn dé valch papa, che ala feje pa i ne sé ma nia cie per i ladins. Depierpul él dut na touta per l nes“, é dla convinzion Pizzinini. Badia y Gherdeina ti é sciampedes economicamenter dantfora al rest de Sudtirol y Sudtirol deventa tres n maiour peis. „Tles valades ladines vàl debujegn de truepes infrastrutures pian via da les zirconvalazions de Selva, Corvara, La Ila, Lungega, ruvan a n tunel anter Selva y Colfosch. Projec che mess vegnì touc en consciderazion unitaramenter, a d’ejempl tres la lia di comuns, a chela che al mess ti vegnì dé plu peis y competenzes. An ne pò nia jì a ti conté dant a la jent che la zirconvalazion de Selva vegn fata te 15 o 20 agn, tant da tec ne é nia la jent ladina. Chilò él da bate cassa a Bulsan con dutes les energies, dovier che i raprejentanc ladins à la responsabelté da se sourantò“, dij Pizzinini. „Mussner à te chesta legislatura la ocajion, ma al mess se mueve, enscì ne vàla nia inant tres a se lascé comané da Durnwalder. Empruma méssel fé l enteres ladins, spo chel de partì, zenza ne se tràtel de deguna raprejentanza ladina. I strumenc politcs a desposizion é dantman. Chest petlament che i ombolc ladins mess fé vigni outa che al é da realisé valch ne é nia de respet per la jent ladina che porta pro tres sies coutes te na gran mesura al bilanz de Sudtirol“, sotrisseia ciamò n iade Albert Pizzinini.
{jcomments on}

Al me plej(0)Al ne me plej nia(2)

5215 iadesc liet