Svp y provinzia ladina

La Svp ne la zed nia con la provinzia ladina. Chest él ence suzedù enier entratant l colocue di jornalisc‘ con Durnwalder che al tegn a Falzes amesa isté per rejoné y respone a domandes sun la politica provinziala. I soui che rejona de „provinzia ladina“ é redont la Svp (ladina), samben nia positivamenter, ma ai la tol ca sciche erma per combate vigni projet y idea che vae soura les seides provinziales fora. I savon che l stat talian ti à fat na bela berta al grup ladin, mantegnian la tripartizion fascista, enceben che da do la vera ne àl nia mancé tresfora reclamazions de unité teritoriala respetivamenter sot a la provinzia de Bulsan y la region Trentin-Sudtirol.

L referendum da souramont dl 2007, con entourn al 80% de scì a Ampez, Fodom y Col, à confermé chesta revendicazion. Ma empò seghita la Svp (ladina) de tré ca la „provinzia ladina“ te sie standard scrit todesch: „Nein zur ladinischen Provinz“,  empede rejoné y dantaldut laoré sun valch projet positivamenter soura les provinzies fora, p.ej.: „Co podéssen pa daidé i comuns referendars de Fodom y Ampez? Cie podéssen pa fé politicamenter per avei te duta la Ladinia la medema scola sot a una na intendenza?“. Al é danz plu saurì mete su l spaventadl dla „provinzia ladina“.
L’autra novela, plu emportanta, é che Durnwalder à reconfermé che al ne candidarà nia plu pro les proscimes lites provinziales dl 2013. Chest ann podessa ence amarscé politicamenter la desfata definitiva dla Svp sciche partì de maioranza assoluta che ne pò nia plu governé da soul, ma mess se chirì n partner de coalizion. A chi ti jirà pa spo do la Svp ladina?

{2jtabs_plugin 2}
{jcomments on}

Al me plej(0)Al ne me plej nia(1)

773 iadesc liet