La scomenciadiva per na majera democrazia popolara de Sudtirol à metù dant na proposta de lege che dess amplié bendebot les poscibeltés de tegnì litazions referendares. Ala é vegnuda aproveda da dutes les istanzes de ejam dampertfora y dess vegnì metuda a litazion referendara, adum a les 4 autres propostes referendares, ai 25 de otober 2009. A la SVP ne ti pléjela nia cis. L diretif ti à sen damané al president dl Consei, Dieter Steger, de lascé concialé i dessegns de lege, sce ai é ben conforms a la costituzion, ajache i litadours ne dess nia vegnì cherdés per nia y con mueia dedò a dé ju sia ousc. L parlamentar Karl Zeller rata che deplù ponc di dessegns de lege ne sie nia conforms a la costituzion. La scomenciadiva per l referendum tol sen posizion:
„L diretif dla SVP à envié enier ofizialmenter l president dl Consei Provinzial de sclarì sce i dessegns de lege proponus da les scomenciadives popolares, sun chi che al dess vegnì tegnù n referendum ai 25 de otober 2009, é conforms a la costituzion. La scomenciadiva popolara rata che n tel sclariment sie na assurdité, ajache al é demé una na istanza legitimeda a dé ju n tel giudize costituzional, la Court Costituzionala enstessa, a Roma. La Court concialarà na proposta de lege provinziala aproveda tres n referendum provinzial demé sce l govern la plura dant a la Court Costituzionala. Dant da n tel formal at ne pò degugn ghiré de dé ju n giudize.
La comiscion de vicars per dejouje referendums provinziai à la enciaria de concialé la conformité di dessegns de lege proponus dai zitadins aladò dla lege provinziala en doura sun la democrazia direta (n. 11/2005) y tamben aladò dl statut de autonomia. Contra sie giudize – dé ju te chest caje dant da 2 agn – él ametù recurs ti termins prevedus. An ne pò nia prejenté sen recurs, apeina 2 meisc dant da la litazion referendara. Sun cie segurté de dert pò pa zenza l zitadin se tralascé?
La ametibelté de propostes referendares che reverda la democrazia direta é bele vegnuda concialeda afonz da la comiscion di vicars, perchel é duc i politics – scluc ite chi dla SVP – enviés da se tegnì a les prozedures vedudes dantfora da la lege y de ne crié degun stravic.
Sce n valgugn ponc dla lege vegnissa desbutés da la consulta dl Consei provinzial o che ala vegnissa rateda lociousa – cie che é tresfora suzedù tl passé – pòla liberamenter porté dant sies comedures.
L medem deport se aspeta la scomenciadiva tl caje che i zitadins essa da aprové la lege tres referendum, zenza messéssen constaté che la SVP proa da pié tl tourbl, se festidian dla costituzionalité canche al se trata dla partezipazion popolara dla jent: empruma entardivan la litazion referendara y daldò – con gran entardivament – métela souraprò en discuscion la conformité costituzionala de n dessegn de lege de scomenciadiva popolara, bele raté endertura da pert de trei vicars. Enultima pòla suzede che ala antervegne a Roma per fé tomé na lege provinziala voluda da la maioranza de consei o da la maioranza popolara. Chest él bele suzedù dl 1997 canche la SVP à pluré pro l Govern, se basan demé sun si dubesc de costituzionalité (zenza avei tles mans n giudize formal dla Court Costituzionala) per ti nié l „Vedù“ a na lege aproveda dal consei regional sun la democrazia direta“.
I dessegns de lege metus a referendum ai 25 d’otober é.
1) referendum per tré dant la jent tl post pro la conzescion de contribuc per l fabriché alesiré, i sostegns finanziars per l afit y les abitazions soziales;
2) ampliament dla poscibelté de referendums popolars pro de gran projec che se ghira l ejam de soportanza ambientala;
3) stop a la desvenuda dl enciasa, ti sourandan deplù podeis regolatifs ai comuns;
chestes é les trei propostes dla „Union für Südtirol“
y en plu 4) n referendum contra l ampliament dl aereoport a Bulsan, metù dant dal „Dachverband für Natur- und Umweltschutz“ y
5) l dessegn de lege general dla scomenciadiva per deplù democrazia popolara tres chel che i zitadins dess ciafé plu lerch, plu ousc y plu poscibeltés de compartezipazion politica de coche la lege sun i referendums popolars atualmenter en doura veid dantfora.
Chesta proposta pòn cherdé su sot a: http://www.referendumbz2009.it/images/stories/documenti/volksinitiative%2007%20besseres%20gesetz%20zur%20dd.pdf
(0)Al ne me plej nia
(1)652 iadesc liet
Scrive n comentar a revert de "Referendums: SVP critica"