UNESCO y unité ladina

La declarazion dles Dolomites a patrimone dla umanité é n gran suzes per nosta tera, ma souradut na gran responsabelté per mantegnì nostes belezes naturales per les generazions che vegn. La ligreza per la dezijon dla UNESCO à lascé lerch a na discuscion pesocia y stranciousa per ciafé la senta de chesta istituzion, che é dessegur na chestion secondara. Marco Pizzinini, vize-president dla Union Generela.
An à l’imprescion che la cossa vegne entenuda da la maiour pert dla jent plu desche poscibelté de desfrutament total y nia desche sconanza dla natura, cis sce an auda les argomentazions de personalités locales, che ne và nia soura l ciampanil de sie paisc fora.
{xtypo_quote_right} Les ghiranzes giustes dla mendranza ladina tirarà bonamenter endò n iade a la curta, ajache al mancia unité.{/xtypo_quote_right}
Mete su la senta tla Ladinia fossa n segn nobl y de respet per nosta tera y per nosta mendranza. Sce al vegn tout criters desche la sconanza dla natura messessa souradut vegnì touc en consciderazion chi comuns che à de gran sourasperses de sie teritore declaredes parch natural (p.ej. Mareo y Ampez).
Les provinzies y les regions vejines con si enteresc economics ignoreia completamenter les ghiranzes giustes dla mendranza ladina che tirarà bonamenter endò en iade a la curta. Conscidran i fac de chestes ultimes edemes pòn vedei tant dalonc che la Ladinia é da n pensé y da n laoré deberieda. La mancianza de na strategia unitara, adum con la tripartizion aministrativa, endeblesc nosta mendranza sun vigni ciamp y chesta é na cossa paradossala, sce an pensa cie che nost raion pieta dal pont de veduda economich, cultural y natural. Samben él spo souradut chi foresc‘ che valoriseia les richezes de nosta tera che à enteres da mantegnì l „status quo“. En plu él da dì che les ciacoles zenza fondamenta de na provinzia ladina vegn redont encundedes da cheles persones che ne à degun enteres a na colaorazion interladina plu strenta.
Con dutes chestes discuscions y divijions ne fej la jent che viv tl raion dolomitan, sen arpejon naturala dla umanité, veramenter nia na bela paruda.

Marco Pizzinini, vizepresident dla Union Generela di Ladins dles Dolomites.