Te Sudtirol vuelel ester programazion economica. Ti ultims 60 agn se à Sudtirol svilupé, sciche ence i vejins entournvia. Sudtirol à na situazion politica particolara che ti à dé de gran vantajes da n pont de veduda economich. Ester tera de confin anter l mond latin y todesch ti à permetù da anuzé l svilup soura y sot a les Alpes. En plu la desvalutazion competitiva dla lira envers al march todesch ti à sport na man aiutoula. L setour che en à abù deplù dancialà é zenzauter sté l setour turistich che é florì su. Da vigni lita tira ca la SVP che l merit é dla bona politica fata te chisc ultims 60 agn. Da na analisa blot economica à la politica ben puech merit, demé na politica suizida essa podù archité l prozes. Na bona politica endere essa podù arvene l svilup te na direzion plu balanzeda.

Ultimamenter végnen pro de vedei tres miec i segnai de descuiliber economich. N ejempl é la vera dl assessour al turism, agricoltura y liber fondiar sudtiroleis, Hans Berger, contra i eserzizes che arbassa i priesc. Ala é comica y desmostra puecia competenza economica; l marcé se damana priesc plu basc y vigni impreisa mess tò sies dezijions y chela de arbassé i priesc é una de chestes. Te na tel situazion ruva te dificoltés i eserzizes mendri; ma canche al é vegnù da programé, àn – tres l ampliament cualitatif y cuantitatif – porté inant na politca che conduj a cie che al suzed sen. An ne pò nia naouta lascé sciampé i lions y spo ti sauté do.{xtypo_quote_right}I joegn te Sudtirol à scialdi demé n contrat temporar o laora te de piceres impreises y é puech stravardés da n pont de veduda sindacal{/xtypo_quote_right}
N auter segn de desbalanzament é les condizions de laour tres plu scletes; i joegn te Sudtirol à scialdi demé n contrat temporar o laora te de piceres impreises y é puech stravardés da n pont de veduda sindacal; les forzes de laour autamenter cualifichedes ne ciafa nia laour te Sudtirol y mess jì foradecà. La dejocupazion sarà bassa, ma chest ne dess nia nes engiané.
I priesc te Sudtirol é mesamenter plu auc che autrò tla Talia o tla Austria vejina. Ence chilò déssel vegnì trat dant la concorenza a na moda da ti dé plu podei de compra a la jent. Sce i penson desche an à dé fora les lizenzes plu dadie, végnel la pel de gialina.
Tl setour publich é les stieres de livel aut bele dedes dantfora. L concurs publich é gonot demé na farsa. Ejempli de chest veres nen él  trueps. Gran descuiliber ence tl setour di laours publics, olàche les impreises che tol pert é massa gonot arconcedes aladò dla pertegnenza politica di imprenditours. A valga moda ciàlen dagnora de daidé i amisc.
Chisc é demé n valgugn ejempli de descuilibers a livel de Sudtirol, vignun de nos podessa nen arcumpedé su n zacotant de autri. Al é vegnù enjumé 60 agn per crié na economia sterscia, ecuilibreda che ti lascia lerch a duc y che ne privilejeia degugn a dann de autri.
Na economica baseda sun descuilibers y puecia ecuité soziala é destineda a jì falindon. Na bona politica economica met al prum post l’ecuité soziala y l svilup sostegnoul. De chesta onse daspavent debujegn te Sudtirol.

Albert Pizzinini

I laoranc sot  a patron  ne se merita  nia  penalisazions

Tl ultim temp se mùdel truepes cosses per cie che  reverda l setour di empliés/ocupés tla aministrazion publica. Te Sudtirol é ll’aministrazion provinziala l majer datour de laour.  Atira  dedò végnel les aziendes sanitares con damprò da 20.000 dependenc.  Sce la sanité sudtiroleisa à na gran mancianza de personsal, cis de infermiers, dess chest vegnì a lum y an dess cialé da emplenì les loces tl enteres dl servisc. Ma al someia che canche valch un và en pension ne dess sia luegia nia plu vegnì corida. Chi che la empaia soura é dagnora i laoranc y la bonté dl servisc.
Tla realté pò l decret dl minister  Renato  Brunetta sun la reforma dl‘ aministrazion  publica ence chilò da nos vegnì adoré contra  i laoranc y contra l carater  publich  dl servisc. La derogabelté di contrac coletifs,  la mobilté y la meritocrazia (tratament aladò dl enrediment) pò vegnì adorés sciche erma contra i laoranc. Chest à ence bele fat scola tles valades  ladines y te Sudtirol. Sce an và zeruch  de 20-30 agn podova ciamò i laoranc avei l contrat de laour zenza  termul de temp. Encuei auden tres plu gonot dijan che i contrac é temporars; i diretours de n ofize depierpul é ben duc a temp nia-determiné. Y vigni pice fal pò vegnì ciastié o ester la gauja de ne vegnì nia plu confermés. Sce n laorant và do si 40 agn de servisc en pension mess i autri laoranc se ciarié su sun sies  sciables l laour dopl ? Tant giustes sarà mo mai les notes y i prems de servisc, olàche propi tl’aministrazion publica vel gonot deplù chel che sta plu a mus? I laoranc dess vegnì tratés unfat. (rt)

{2jtabs_plugin 2}

Al me plej(0)Al ne me plej nia(1)

759 iadesc liet