Chest ann à la Comunanza Ladina de Bulsan fat fora de organisé n viade cultural de n dì per jì a vijité l Ciastel Beseno y l raion de Folgaria tl Trentin. L Ciastel Beseno, l plu gran ciastel dl Trentin, é sté per plu centenés l simbol dla defendura dl Trentin y dl Tirol. Dl 1973 ti à la familia Trapp scinché l ciastel a la provinzia autonoma de Trent che à metù man con na restaurazion longia a na moda de podei l daurì al publich. Al vegn tout su sen les prenotazions.
L viade, che vegnirà metù a jì en domenia, a 4 de otober 2009, preveid che an ruve da mesdì al restorant Cogola a Serrada de Folgaria a marené olàche l sourastant dl’assoziazion turistica y storich Fernando Larcher y l assessour Paolo Daprà portarà dant n salut y darà n valgunes spligazions sun luech. Enfin al scomenc dl secul passé rejonòven a Folgaria „zimber“, n dialet todesch ruvé sun al altiplan dl 1200 con colonisadours di 7 comuns vicentins (Asiago/Sleghe) de sclata todescia-bavareisa, cherdés adalerch dal prinz-vescul de Trent, Fidrì Vanga II, a runcé les temples y i plans de Folgaria. Encuei rejònen demé plu a Lusern „zimber“ tl Trentin. Do marena él sun l program na spazireda te y entourn al paisc, anter l auter tla picera vila „zimbra“ de Perpruneri (Bärenbrunner) dlongia „Passo Sommo“ y contra la frazion de San Sebastiano. Da chest sit dret panoramich pòn vedei gran pert di paisc dla planura auta: San Sebastiano, Carbonare (Kohlern), Lavarone (Lafraun) y Luserna (Lusern).
A chest viade (pieda via da Bulsan da les 8.30 y arciaseda entourn a les 18.30) é enviés duc i ladins con amisc y parenc. Chi che vuel tò pert (priesc 30 euro per i sozes y 40 euro per i autri) é priés de se noté su dantfora al numer de telefon 0471 983687 o 3463520845 de Ivan Lezuo da mesdì o da seira do les 7.00.
![](http://www.noeles.info/wp-content/plugins/like-dislike-counter-for-posts-pages-and-comments/images/up.png)
![](http://www.noeles.info/wp-content/plugins/like-dislike-counter-for-posts-pages-and-comments/images/down.png)
847 iadesc liet
Scrive n comentar a revert de "Comunanza a Folgaria"