Joufs: dant signoria ….

L president dla jonta provinziala de Bulsan Durnwalder, Luis Durnwalder, ti à metù dant chisc dis al president dla provinzia de Belun, Gianpaolo Bottacin (Lega Nord), n stude sun les conseguenzes dl daz sun i joufs dolomitans. Ence sce dal stude ne végnel fora degunes indicazions cleres, se emponta Durnwalder sun la sia de scode n daz. I joufs dolomitans é dantaldut stredes de coliament emportantes anter les valedes, al basta demé pensé ai joufs de Frera, Sela, Ciaulonch y Arparora. La direzion politica nueva de man dreta a Belun, con la Lega Nord a cef, é dutaorela plutost freida envers a la proposta de saré joufs dolomitans a seida con Bulsan.

„L’introduzion de n daz sun chisc joufs ne fajessa nia auter che isolé ciamò deplù les valedes che à n debujegn vital de comuniché. L dann per l inom turistich y l’economia fossa gran. En plu jissa l daz contra i prinzips costituzionai. Tl caje de na introduzion de n daz da pert dla provinzia de Bulsan, vuel Ladins Dolomites entlé la provinzia dant a la signoria aministrativa per garantì i derc de zircolazion tl enteres dla popolazion ladina.

Per cie che reverda l coliament anter Badia y Gherdeina y per combate l trafich sun l jouf de Frera rata LD che la soula soluziun chela de n tunel de coliament anter les does vals con de gran vantajes per la popolazion y l turism. Nia da capì ne é – aladò de Pizzinini – la posizon de Mussner che ti và do a la lingia conservatoura al intern dla coalizion SVP che studia fora vigni maniera per scode coutes y corì enscì les loces de na gestion aministrativa dret debla che te temps de reduzion dl budget provinzial se lascia sentì tres deplù.

{2jtabs_plugin 2}

Al me plej(0)Al ne me plej nia(1)

703 iadesc liet