La Consulta ladina dl comun de Bulsan met a jì chest meis de november tl cheder de „Ladinia Mujiga y poejia“ trei manifestazions culturales che met man en mercui, ai 11 de november, da les 20.30 tla Carambolage, Str. Argentieri/Silbergasse a Bulsan. La pruma seira é na enconteda leterara con Roberta Dapunt, joena poeta ladina dla Val Badia.
Ala porta dant scric touc fora da sie liber “La terra più del paradiso” (Einaudi poesia, serie bianca). Al se trata dla revelazion dla poejia taliana dl 2008, na ousc sćiantiva de gran forza espressiva, foresta. Acompagnament musical de Matteo Facchin con l orghen da mantesc.
Roberta Dapunt é nasciuda dl 1970 y viv tla Val Badia. Sia lirica é carateriseda da festide y armonia adum, da n percurs tormenté y saren. Les figures che ala chier fora é de mort y de naturalité y sia odleda ti và do a les sajons y a les besties tl chiet de si creps y dl’anima. Per l critich Giovanni Tesio é sia ousc sciche na sita, de inozenza spontana: ala arjonj la “scempleza” (al é ence n test out a sia oma dal titul „Poesia semplice“) tres n majenament dur, n troi che se smendresc tres deplù.
L program và inant en mercui, ai 18 de november, tres da les 20.30 tla Carambolage con l grup „Pëufla“ de Gherdeina. Al se trata dl prum grup rock de Gherdeina. Chest vuel dì che ai ne é nia plu joegn, ma che ai à abù n grum de temp da scrive de biei toc de mujiga. Ai sona dal 1993 encà mujiga che ai met adum con tesć che vegn dal ciamp musical internazional. Sie ultim CD „Safari on the moon“ é vegnù nominé per l South Tyrolean Music Award 2008 sciche „Best Album“. Emplù é 2 composizions de chest CD „L Troi“ y „Lazy morning“ vegnudes nominedes tla categoria „Best song“.
Ai sonarà trueps toc che é en gran pert touc fora di albums publichés ti ultims agn. Con bateria, chitara, bas, clavier y oujes audiaràn sons a chi che al ti vegn dit per l plu rock, funk, rap y grunge.
La lignola de manifestazions vegn scluta ju en mercui, ai 25 de november, tres da les 20.30 tla Carambolage, con Trebo Pagnozzi Duo – Jazz: Guglielmo Pagnozzi Sax, Clarinet – Alessandro Trebo Piano. Les soluzions musicales desvalives dl clarinetist y saxofonist Guglielmo Pagnozzi, profescionist dl jazz talian dai prums agn nonanta (al à soné con artisć internazionai y talians desche Lester Bowie, Steve Lacy, Ernst Reijseger, Bob Moses, Enrico Rava, Antonello Salis, Roy Paci), enconta te chesta sereda l pianism istintif de Alessandro Trebo, pianist y componidour da San Martin de Tor. Trebo à metù su les bands Mop Mop, Play (con Max Castlunger) y Chrisalide Jazz Clown Duo (con Chris Costa); al sona stabilmenter con la Spolpo Blues Band y con la formazion de Afro Beat Voodoo Sound Club. La mujiga prejenteda dai artisć jirà da la interpretazion personala de classics afroamericans a la esecuzion de composizions originales di doi musizisć.
(0)Al ne me plej nia
(0)706 iadesc liet
Scrive n comentar a revert de "Ladinia: mujiga y poejia a Bulsan"