Chiet, o ciel …

„Ei, lascede jolé vostes oujes per che les eles posse deleghé con enchersciadum“, auden da do l clavier ca na ousc clera. Y l bass stima con volenté y entoneia con imerjion depierpul che l tenor arven la ousc contra l pont colminant (y les notes é veramenter autes) y la saour musicala desfauda sia fazion.

Dal gust plu fin, unfat sce salé o douc, se cruzia samben les oujes dles eles: stabil l alt y damprò al ciel l sopran. Da deleghé ne perdùjen samben nia temp, ajache André Comploi,  l el do y al clavier, fondadour y dirighent dl cor de studenc „cantus iuvenis“, dà dant l tact y l ritm. Samben allegro vivace. Sceben che adagio ne vegn nience trascuré per che l misterious vegne a lum.

Vigni juebia s’enconta anter caranta y cincanta joegn: dret trueps sudtiroleisc, valch é  ladins, i autri vegn da duta l’Austria y da d’autri stac. Y deberieda ciàntei ćianties da dut l mond fora de n repertore classich y modern ampl y zinch che s’adateia a la roda dles sajons y che pieta de biei momenc aladò dla tradizion musicala religiousa y profana.

Y sen él Nadel.  Vuel dì nia ciamò daldut. Plutost advent, l aspeté al Nadel. L Salvatour. Y truepes cianties che se muev saurì tl aier freit dl invern. „cantus iuvenis“ les ciufa y  porta dant dlongia trueps d’autri toc „Rorate coeli“ (J. G. Rheinberger), “Lasset uns frohlocken“ (F. Mendelssohn Bartholdy), „O nata lux“ (M. Lauridsen) y „Na ciandeila“ (de André Comploi con l test de Lois Ellecosta) te n conzert d’advent ai 5 de dezember tl Ragenhaus a Bornech. La picia ciandeila ladina ilumineia la semena musicala che met man sie iade con „Still, oh Himmel“. Y chesta ciandeila se delegarà n iade, chel dessegur. Y an dess n iade podei dì che „cantus iuvenis“ à porté pro con imprescion a l’atmosfera de preparazion al temp plu chiet de dut l ann. Te chel che ence cuers de ei se deleiga.

Sebastian Gilli, Tenor
„Chiet, o ciel / Still, oh Himmel“

conzert d’advent dl cor „cantus iuvenis“
direzion musicala: André Comploi
sabeda, ai 5 de dezember 2009, 20.00 h
Ragenhaus, Bornech

Al me plej(0)Al ne me plej nia(0)

852 iadesc liet