Université a Persenon: mujiga ladina

Tl semester da d’isté 2010 pieta la Repartizion Ladina dla Facolté de Scienzes dla Formazion dla Université Ledia da Bulsan trei cursc opzionai.

Sun l program él n curs de mujiga popolara, dlongia n curs de linguistica aplicheda y n curs da scrive ladin te does variantes. Chisc pò ence vegnì frecuentés da enteressés desche “student ghest”. Ai ensegnanc ti végnel reconesciù i cursc sciche ores de formazion

 

Cianties ladines per scola y scolina (Codesc 12202)

L prum travert dl curs é da pité na souravijion lergia dla storia y dl repertore dla mujiga vocala ladina, dantaldut dla Val Badia y de Gherdëina. Enscì vegniràl na outa prejenté y analisé cie che s’à mantegnì dles cianties de tradizion anonima: cianties da filé, rimes, juesc per mutons, nines nanes y e.i..

Al vegnirà spo les cianties popolares dla seconda pert dl 19eisem secul pro cheles ch’an conesc almanco l autour dl test o l compositour dla melodia o entrami, desche p.ej. Angelo Trebo, Jepele Frontull, Leo Runggaldier, Lipo Verginer, Siegfried Demetz, Amando Alfreider, Alejio Baldissera, Vinzenz Maria Demetz, Emrich Kostner, Hans Demetz, Stefan Demetz, Alfons Willeit, Lois Ellecosta, Lois Craffonara, Eduard Demetz, Iarone Chizzali, Iaco Rigo, Rut Bernardi, Bruno Rives y d’autri. Al vegnirà analisé l test, la mujiga y l contest dles cianties che ai à scrit.

N second travert sarà da ciafé fora cie toc y cie cianties che é adatedes per l cianté te scolina y te scola. Plu inant ti vegniràl cialé ence ai parametri de basa dl’educazion al cianté con mutons: la fisiologia dla ousc di mutons (fle, son, ambitus, mudazion), les capazités dla ousc di mutons (desposizion, defizic), les „massaries“ dl’educazion dla ousc (vocai, consonanc). Al vegnirà ence pité propostes de eserzizes per sciaudé ite la ousc denant che mete man da cianté y per svilupé la ousc di mutons. Aldò di eserzizes desvalifs per l portament dl corp, per l fle, la ressonanza, la vocalisazion, l cianté aut y bas, legato y staccato, la dinamica y e.i. vegniràl tres endò tout ca les cianties ladines ch’an à emparé a conesce tla pert teorich-storica. Dlongia reflescions sun l valour pedagogich dl cianté vegniràl spo ence prejenté schems coch’an podessa ensegné ite na ciantia a na classa de mutons y cie poscibeltés d’acompagnament y de moviment ch’an à.

L terz travert é la pert creativa dl curs: les studentes y i studenc arà la poscibelté da traspone la teoria tla pratica, p.ej. ti ensegné ite na ciantia al grup, se fé pensiers sun l acompagnament strumental, fosc enchnamai s’inventé n test y/o na melodia de na ciantia per mutons.

Aldò dl grup y dles poscibeltés dess l curs vegnì sclut ju con n laboratore davert olache al vegnirà adalerch ence n grup de mutons. Con chisc laorarà les studentes y i studenc provan fora les conescenzes y les abiltés che ai s’à aproprié y prejentan val’ cianties ladines chirides fora dal repertore traté tratant l curs.

L program plu avisa:
Data Argoment
Sabeda 27.3.10, 14.00-18.00 Introduzion storica; souravijion dl repertore vocal ladin; cianties de tradizion anonima; Introduzion a l’educazion al cianté con mutons y reflescion sun l valour pedagogich; Pert creativa / pratica: cianties de nina nana, da filé, rimes, juesc per mutons
Sabeda 17.4.10, 14.00-18.00 La ciantia popolara dl 19eisem secul; La fisiologia (fle, sonn, ambitus, mudazion) y les capazités dla ousc di mutons (desposizion, defizic); Pert creativa / pratica: cianties popolares dl 19eisem secul
Sabeda 24.4.10, 14.00-18.00 La ciantia popolara dl 20eisem secul; sciaudé ite la ousc de mutons: portament dl corp, l fle, la ressonanza; model d’eserzize; Pert creativa / pratica: cianties popolares dl 20eisem secul
Sabeda 15.5.10, 14.00-18.00 Cianties per mutons d’aldidancuei 1; Svilupé la ousc di mutons: cianté aut y bas, legato y staccato, dinamica; Pert creativa / pratica: cianties per mutons d’aldidancuei
Sabeda 5.6.10, 14.00-18.00 Cianties per mutons d’aldidancuei 2 ; L’interpratazion de cianties per mutons; Pert creativa / pratica: laboratore con mutons

Linguistica aplicheda ladina (Codesc 17100)

Curs tegnì da la d.ra Gerda Videsott con chest program:
Lunesc, 01.03.10, 16.00-18.00 Classificazion di lingac (can rejònen pa de lingaz, can de dialet? Parentela anter i lingac)
Mertesc, 09.03.10, 14.00-16.00 Fonetica y fonologia (Definizions, desferenzies, conseguenzes ortografiches)
Mercui, 24.03.10, 9.00-11.00 Morfologia (Definizion y ejemplificazion)
Mertesc, 20.04.10, 11.00-13.00 Sintassa (Definizion y ejemplificazion)
Mertesc, 04.05.10, 9.00-11.00 Semantica (Definizion y ejemplificazion)
Mertesc, 11.05.10, 9.00-11.00 Neurolinguistica (co ruva pa l lingaz tl cervel y co laora pa nost cervel con l lingaz?)
Mercui, 26.05.10, 9.00-11.00 Multilinguism (Definizion, aplicazion te scola, dreta eté per scomencé con deplù lingac)

Curs de ladin scrit per Ladins

Per i Ladins che vuel aumené sia competenza tl scrit dles variantes dla Val Badia y Gherdëina, végnel organisé da pert dl Zenter Linguistich dla Université de Bulsan n curs aposta de ladin scrit dla Val Badia (dr. Giovanni Mischì) y de ladin de Gherdëina (dr. Rut Bernardi). Chest curs é ence pensé per chi studenc dles scoles autes todesces o talianes che volessa endò ruvé ite tl ladin scrit en previjion de n sie stude tla Repartizion ladina a Persenon.

Informazions emportantes: dutes les lezions vegnirà tegnudes a Persenon tla Facolté de Scienzes dla Formazion (streda Regensburg 16). Duc pò se scrive ite, al ne vegn nia damané la matura. Informazions plu menudes soura les condizions d’iscrizion é da giaté tl secretariat di studenc dla Facolté de Scienzes dla Formazion (0472/012200); i formulars pò ence vegnì desćiariés dal internet (http://www.unibz.it/web4archiv/objects/pdf/standard/2008_f_gasthoerer_beidesitze_neu_ohnematura.pdf ). Les informazions sun l curs de ladin dà l Zenter linguistich (0471-012400; language.centre@unibz.it). Per i cursc él da paié ite 50,00 € l’un.

Informazions plu avisa sun vigni curs pòn ciafé dal prof. Paul Videsott (paul.videsott@unibz.it). L ultim termin per se scrive ite é i 20 de fauré 2010.

1046 iadesc liet