Tles valedes ladines él prevedù per i dependenc publics l’indenité de trilinguism, ma nia dlonch fora dles vals ladines. Chesta indenité ti vegn paieda fora da chest ann ence ai empliés de n valgugn puec ofizes dla Provinzia con senta foradecà. L personal ladin ti ospedai endere ne ciafa inant nia.
Sen giata l personal tl ofize per les scoles ladines, tl ofize dl istitut pedagogich, tl ofize cultural ladin, i colaboradours di ofizes esterns a Brüssel y a Roma y l referent personal dl sourastant dla provinzia la identité de trilinguism, ence sce ai laora foradecà.
„Desmentié él depierpul vegnù l personal publich restant“, dij Franz Fiung de Ladins Dolomites, „sciche l personal dla azienda sanitara y de autres istituzions dla provinzia“. An se damana: é i ladins con sie trilinguism na mendranza manco de valuta che la mendranza di todedsc o talians? Chisc ultims fej l ejam de bilinguism y ciafa soura duta la provinzia l’indenité de bilinguism, belunfat olàche ai laora. I Ladins fej l ejam de trilinguism y na pert ciafa demé tles valedes ladines la indenité de trilinguism! „Chest é n parados y n tratament desvalif al livel de mendranza! I dependenc ladins che laora fora dles valedes ladines se damana n tratament valif y degn. N problem politich che mess vegnì traté dal raprejentant te jonta“, se damana Franz Fiung.
![](http://www.noeles.info/wp-content/plugins/like-dislike-counter-for-posts-pages-and-comments/images/up.png)
![](http://www.noeles.info/wp-content/plugins/like-dislike-counter-for-posts-pages-and-comments/images/down.png)
702 iadesc liet
Scrive n comentar a revert de "Te ospedal: degun trilinguism"