Tla tera di Zimbri

Chest ann à la Comunanza Ladina con a cef Silvia Alfreider fat fora de organisé n viade cultural de n di per jì a vijité l Museum Etnografich de Cultura Zimbra tl plan aut dl’Alpago tl Beluneis.
Te chest museum végnel documenté la storia dla vedla comunité zimbra vegnuda adalerch sul scomenciament dl 1800 dal plan aut de Asiago/Sleghe.
Te chest raion ései vegnus a laoré l lignam de faghér per produje con chest legn scatoles, formes dal ciajuel y autres massaries che vegniva adoredes tla vita da zacan denant dla vegnuda dla plastica. Chestes massaries vegniva venudes o ence baratedes tl raion venet vejin con speises da mangé y auter patuc per i debujegns dla comunité. Chesta comunité zimbra de za. 500 persones s’à mantegnù per dut l 1800 dagnora destacheda da la comunité veneta che vivova ti paisc vejins. La comunité fova enciaseda te 5 viles (Vallorch, Pich, Val Bona, Canaie, Pian dei Lovi) y les families storiches fova cheles di Azzalini, Bonato, Slaviero, Gandin y Loser. Da la fin dl 1800 enchin a mez l 1900 él vegnù porté inant na politica che à sforzé i Zimbri a arbandoné sies ciases tl bosch per jì a se enciasé ti paisc vejins dl Venet; chest fenomen à porté pera ence a la descomparida dl lingaz zimber. Aldidancuei vìvel tl bosch dl Cansiglio demé 10 families con za. 30 persones che laora tl ciamp dl turism y dla manutenzion teritoriala tla cooperativa “Tzimbar Balt” (bosch zimber).

L priesc per tò pert a chest viade é de € 30.00 per i sozes dla Comunanza y si familiars y € 40.00 per duc i autri.

A chest viade é enviés de cuer duc i ladins con parenc y amisc; chi che vuel tò pert é priés de se anunzié al numer de telefon 0471-983687 o 346-3520845 de Ivan Lezuo da mesdì o do les 7.00 da seira.

Al me plej(0)Al ne me plej nia(1)

737 iadesc liet