Festa dla Generela

Ai 25.09.2010 él sté a Ciastel Prösels a Fie sot al Scilier la Festa dl Popul Ladin organiseda da la Union Generela di Ladins dles Dolomites (UGLD).

Domesdì él gnù fora bel temp y bele da dalonc podòven vedei l ciastel enfornì de bandieres ladines.

Al é ruvé adalerch jent da vigni pert dla Ladinia ma souradut ence ladins residenc foradecà (enfinamai da Desproch). Dles autorités fòvel prejentes l’assessoura Daniela Templari, la procuradoura dl Comun General de Fascia Cristina Donei, l intendent a la scola ladina Roland Verra, l ombolt de Mareo y de Soraga.
Do l’introduzion con l inn europeich cianté da Chris Costa, che à ence plu tert abelí la festa con sia cornisc musicala, él spo sté la presidenta Elsa Zardini y l vizepresident Marco Pizzinini che á porté dant les paroles de salut da pert dla Generela. Duc à sotrissé l’emportanza de chestes festes per fé sterch l sentiment d’unité ladina a prest 90 agn da la despartizion. De beles paroles à ence abù Cristina Donei dijan anter l auter na
cossa dret emportanta: i fascians fossa a una da tò de revers sia verscion per la cherta d´identité ladina y tò chela per LD sce i autri comuns ladins fossa ence a una. Plu tert él spo sté  vigni union de valeda che à prejenté sies publicazions plu rezentes. Te chest contest él gnù prejenté l liber dl telefon per duta la Ladinia. Al é l prum iade che al vegn fat na tel cossa. Duc i comuns ladins é metus ite en ordin alfabetich, ence les frazions ladines dl comun de Ciastel (Bula y Runcadic) y de Laion (Pontives). Al é n liber, te chel che al é gnù metù ite trueps inoms ladins locai de families, de luesc y de mestiers. Chesta cossa ti dà na gran emportanza simbolica a chesta publicazion.
Al é ence gnù organisé n quiz con domandes sun la storia, cultura y geografia dla Ladinia con pesc‘ per i partezipanc con deplù respostes dretes. Entratant la festa él gnù tenù su sun meisa spezialités ladines. La festa é gnuda scluta ju con la ciantia „Bel Lingaz“.

An pò dì che la festa é steda n gran suzes y à abù n gran aprijament da pert di partezipanc.
Chest ti dà dessegur na gran forza a la UGLD da jì inant sun sie troi da laoré per mantegní nost lingaz y nosta cultura. Che les maioures autorités politiches ladines à endó n iade boicoté na festa organiseda da la UGLD desmostra che la strentura de pensíer gaujeda da na gran tema da la prescion politica va soura la volonté da laoré deberieda per l ben de nosta mendranza. L travert de chestes persones da delegitimé y endeblì definitivamenter la UGLD vegn ultimamenter entres plu cler!

Al me plej(0)Al ne me plej nia(1)

772 iadesc liet