La intervista dl dot. Francesco Palermo (foto), „espert de dert de mendranzes“ che laora ence per la Academia Europeica, deda ai 27 de november a la TZ, à fat levé su stuep.
Ala desmostra endò n iade che al ne à nia nout la problematica de Ampez, Col Santa Lùzia y Fodom. Demé enscì pòn se splighé che al desprija endò n iade l referendum di 28-29.10.2007 sciche n fat blot economich, pro che al é demé vegnù adoré „rejons de identité ladina“ per sciaudé su la chestion.
Fat él endere che la mendranza ladina di trei comuns à prové tresfora dal 1946 da arjonje che i confins dl temp fascist vegne mudés y l tort fascist refat. Fat él tamben che i ladins da souramont é dal 1946 inant zenza vigni sconanza y mess scombate per souravive. Fat él souraprò che la mendranza ladina te Anpezo, Col y Fodom ne vuel nia dé su sia identité ladina y à perchel metù a jì l referendum che ai à davagné. I ladins da souramont à l dert dla Comunité Europea sun sia pert, ajache la Cherta dl’Europa per lingac regionai y de mendranza scriv clermenter dant che confins politics-aministratifs te n teritore de na mendranza ne pò nia ester de rem per arjonje na unité. I ladins é la soula mendranza te duta la Talia che é spidiceda su sun deplù provinzies y regions.
Marco Pizzinini, vize-president dla UGLD
(0)Al ne me plej nia
(1)898 iadesc liet
Scrive n comentar a revert de "Palermo seghita a desprijé"