Monumenc fascisc‘ y confins

Ai parlamentars dla SVP ti él garaté n bel suzes: la Provinzia podarà ti „tré i dents“ ai monumenc fascisc‘ de nosta region. Baudi é n auter monument fascist, che à conseguenzes cotant plu grieves che chi de pera, resté defora da chesta acordanza: l confin fascist amesa la Ladinia fora. Chest confin despartesc i Ladins te chi che à na sconanza y chi che ne l’à nia. Y i Ladins zenza sconanza é destinés da morì fora.

Al é dessegur rie da sposté confins, ence sce chesta é la volonté dla jent;  per che la cossa garete, messaràl ciamò regore truepa ega fora per nosta tera despartida. Ma bele sen fòssel  da anuzé chesta poscibelté, olàche nosc raprejentanc dla SVP a Roma  à  na gran parola, da damané per la mendranza ladina dla provinzia de Belun i derc fondamentai desche l ensegnament dl Ladin te scola, adoré l ladin desche lingaz aministratif y samben ence na raprejentanza politica assegureda tla provinzia de Belun y tla region dl Venet.

Che l confin anter les provinzies de Belun y Bulsan discriminieia chi da Souramont deplù che n confin statal pòn  p. ej. vedei con la  “ Ciasa di ladins a Balsan „, fata su con finanziamenc che do l proporz fova destinés a nosta mendranza. Demé ladins aciasés tla provinzia de Bulsan à l dert da damané n post te chesta ciasa. Les lueges vuetes ti vegn spo plulere dedes a jent da foradecà, p.ej. a extracomunitars che a studenc da Souramont. Ne podessa pa nia  nosta provinzia o ence la Euregio ti dé i medems derc a ampezans y fodoms desche la jent de Südtirol à fora tl’Austria?

Con n pue de bona volonté podessa l confin  fascist amesa la Ladinia fora  perde entres deplù sia emportanza y sie peis sun l davegnì de nosta mendranza. Ne vàla pa veramenter da fé nia?
Ne podessa pa nia la Lia di Comuns, desche raprejentanza politica dla Ladinia, porté inant chestes y d’autres chestions che reverda l souravive de nosta mendranza?

Marco Pizzinini,
Vizepresident dla UGLD

Al me plej(0)Al ne me plej nia(0)

748 iadesc liet