Templari: Nience nos ne on nia da festejé

Tla provinzia de Bulsan él sté l assessour Florian Mussner che à tout posizion clermenter contra na partezipazion di ladins a la „festa dla unité d’Italia“. La presidenta dla Union di Ladins de Fodom Daniela Templari, n iade ence assessoura tla provinzia de Belun, sostegn Luis Durnwalder. „Nience i ladins de Fodom y Ampez ne à nia da festejé“ àla dit al „Corriere delle Alpi“ chisc dis.

„I son con Durnwalder“ à dit Daniela Templari, „nosta jent se sent lieda al Sudtirol de chel che ai fajova pert enfin al 1923, en chel ann ései gnus destachés contra sia volonté. Dl 1939 é Fodom gnù tout ite tl raion dles opzions. Al se trata de plaies dutaorela davertes“. „Sconé les mendranzes fossa n dovei dl stat“ (ma evidentamenter ne él suzedù nia a Souramont de chest vers), à dit Templari, enjontan che „la identité ne pòn nia compré, nience con l’autonomia che é perauter garantida tl caje de Sudtirol da tratac internazionai“. „Ence nos ladins da souramont nes sention na „preda“ de vera, sciche l Sudtirol, y i son convencius che i ne on nia da festejé. Perchel onse fat l referendum per jì inaò al Trentin-Sudtirol, ajache ilò nes sentionse da ciasa“.

Albert Pizzinini de Ladins Dolomites (LD) à dit te na intervista en resposta a Florian Mussner che Durnwalder essa, sciche raprejentant istituzional da tò pert a les festivités y nia sciuré ciamò plu benzin sun l fuech. Pizzinini rata ence che al fossa dret che la SVP da se cruziassa deplù dla unité di ladins, depierpul che patajé con l govern Berlusconi con tò demez o curì monumenc tl temp fascist.

Al me plej(0)Al ne me plej nia(0)

758 iadesc liet