LCL ti dà plen sostegn ai comuns referendars

En gaujion de na enconteda dla Lia di comuns ladins (LCL) en l’edema passeda él gnù tout chesta ressoluzion a sostegn dla ghiranza di 3 comuns referendars da souramont de gnì endò acorpés a la region Trentin-Sudtirol. Entratant él bele passé 4 agn dal referendum dl 2007 y enfin a ciamò ne s’àl armuet net nia. Festa do l referendum a n’Ampez.

Lia di Comuns ladins
metù dantfora
che la mendranza ladina-dolomitana, aciaseda ti comuns de Mareo, San Martin de Tor, La Val, Badia y Corvara, Selva, S. Cristina, Urtijei y tles frazions ladins dl comun de Ciastel, Cianacei, Campedel, Mazin, Poza, Vich, Soraga y Moena, Fodom y Col Santa Lùzia y Cortina d’Ampez é la soula mendranza storica tla Talia che sceben che ala vive te n teritore geograficamenter copat, é partida su aministrativamenter te does regions y te trei provinzies desvalives per gauja dl decret fascist n. 93 di 21 de jené 1923, metù en doura con intenzion declareda de assimilé plu debota la mendranza ladina;

che la cherta europeana di lingac minoritars y regionai di 5 de november 1992 da pert dl Consei Europeich y sotescrita dal stat talian ai 27 de jugn dl 2000, veid dantfora al art. 7 „l respet dl raion geografich de n lingaz regional minoritar, fajan a na moda che les despartizions aministratives esistentes o nueves de sie nia n ostacul per la promozion de n lingaz regional o minoritar“;
che les disposizions de sconanza dla mendranza ladina-dolomitana é tla region Venet assolutamenter mendres de cheles en doura tla region Trentin-Sudtirol y che s’à relevé nia assé per mantegnì la mendranza ladina, en particolar végnel segnalé la nia-oblianza dl ensegnament dl ladin te scola y la nia-ofizialité dl lingaz de mendranza;

che la Costituzion taliana veid dantfora al art. 132, coma 2 la poscibelté de indì n referendum a livel comunal per mete a jì l inter per la mudazion de region;
che i comuns de Fodom y Col Santa Lùzia y Cortina d’Ampez à bele tegnù chest referendum aladò dl art. 132, coma 2 i dis 28-29 de otober dl 2007 pro chel che l quorum ghiré é autamenter vegnù superé con l 78,86% de oujes a favour de na mudazion dla region (76,53% tl comun de Ampez, 83,33 tl comun de Col Santa Lùzia y dl 86,42% tl comun de Fodom).

che l resultat de chest referendum positif é gnù proclamé da pert dl ofize zentral dla Court de Cassazion ai 5 de november 2007 y atira do la publicazion tres la publicazion da pert dla Presidenza dl Consei di ministri tla Gaseta Ofiziala ai 8 de november 2007;
che da chel dì él passé entratant soura 4 agn, zenza che al sie gnù dé n vare inant per realisé la volonté popolara esprimuda  tl rerendum da pert dles istanzes competentes;
che l govern Monti à vedù dantfora l acorpament dla provinzia de Belun a chela de Treviso y perchel te vigni caje na variazion di confins provinziai,
metù dant dut cant chest
sostegn La Lia di comuns ladins
plenamenter la volonté di trei comuns de Fodom, Col Santa Lùzia y Cortina d’Ampez de fé endò pert dla region Trentin-Sudtirol, da chela che ai é gnus destachés dl 1923;
y se damana
che les istanzes competentes mete man con l iter prevedù per mudé region, se tegnan a les disposizions dl articul costituzional n. 132, 2 coma y la lege di 25 de mei 1970, n. 352.

Al me plej(0)Al ne me plej nia(0)

821 iadesc liet