Segns de identité

Bandiera ladina, fasciana o de Tirol? La cherta de L. Senoner tla ultima Usc desmostra endò n iade tant pice che l savei é sun aspec fondamentai dla identité ladina. Plu pice che chest savei é, plu saurì che ala và da fé polemiches deplazedes. Vigni grup de studafuech, dl sport, vigni mujiga à na bandiera: al é n segn de na identité deberieda. Tant deplù toca pro la identité de n popul ence na bandiera – enscì éla soura dut l mond.
La storia dla bandiera ladina messessa perdret ester conesciuda: ala é vegnuda prejenteda ai 5 de mei dl 1920 jun Jouf de Frera te na manifestazion olache reprejentanc de dutes les valedes ladines ova protesté contra la negazion ai Ladins dl dert a l‘ autoderminazion. L promotour de chesta bandiera, sce al fossa ciamò da l recordé n iade, fova de Gherdeina. I Ladins che se ova abiné sun Jouf de Frera se sentiva dessegur duc tiroleisc – zenza ne se essi damané no autodeterminazion, no na bandiera. La bandiera ladina ne fova nia vegnuda fata empede la bandiera blancia y cuecena dl Tirol, ma laprò. Y chesta sort de compromis podessa ben ence jì ben al didancuei.
Da la cherta de L. Senoner pòn endere lieje fora na sort de radicalism che ne podessa perdret avei deguna lerch te na provinzia, o ence te n partì che dij da respeté les mendranzes: ti tol na bandiera ladina tacheda fora te Gherdeina valch a na bandiera dl Tirol? Dì che la bandiera ladina é la bandiera de Ladins Dolomites é avisa tant falé che dì che la bandiera dl Tirol é chela dla SVP – scebegn che entrami i grups politics adora chestes bandieres, davia che ai se identificheia con ela.
L. Senoner à na sia bandiera tl cuer, ne pò d’autri Ladins nia nen avei n’autra o cinamai does, chela dl Tirol Y chela ladina? Ai gran „tiroleri“ de Gherdeina fóssel da ti recordé che l Tirol é dagnora sté plurilinguistich y ence ladin. Chi che miena perchel de messei desprijé cie che é ladin, y ence sia bandiera, ne è dessegur nia de bogn tiroleisc.

Marco Pizzinini

Al me plej(0)Al ne me plej nia(1)

856 iadesc liet