Karl Senoner da Santa Cristina ghira te n sie comentar al “Memorandum ladin” na region ladina y l’autodeterminazion plena per l lingaz y la cultura ladina y che l’autodeterminazion vegne scrita ite tl Statut de Autonomia. La pruma ghiranza sarà ria da realisé tl contest politich y istituzional atual (3 provinzies y 2 regions) ma l’autodeterminazion culturala pò y dess vegnì damaneda aldò dl prinzip de valivanza di derc anter les trei comunités linguistiches de Südtirol. I todesc à bele da giut arjont chest travert, i ladins endere tira tres ciamò a la curta, tamben te Südtirol che tl Trentin, y ciamò truep deplù tl Veneto. Chesta descriminazion auda da vegnì trateda a fonz ence tla Convenzion per la reforma dl Statut de Autonomia.
La cultura ladina depend de trueps versc da la cultura dominanta, chela todescia te Südtirol y chela taliana tl Trentin y tl Veneto. La prescion di gran lingac vejins sun l ladin ne é nia demé n fat natural, ala vegn renforzeda cotant da les infrastrutures publiches y privates de sostegn a la cultura. Les infrastrutures deida, ma ales pò ence deventé na ciaveza sce ales é te mans forestes; chest é da vedei dret cler te Südtirol, cis tl ciamp dla cultura popolara. Les mujighes, i cors y i grups de bal popolar ladins ne fej nia demé pert de n “Südtiroler Landesverband” ma sia mujiga se desferenzieia puech y nia, dal punt de veduda dl stil y dla pratica musicala, da la “alpenländische Volksmusik”. N forest che scouta pro ne auda fora praticamenter deguna desferenzia anter n grup ladin y n grup tiroleis todesch, a pert, poester, l lingaz. I “Ladiner”, per ejempl, à de ladin demé l inom (per todesch), sies cianties, ence cheles pueces ladines che ai cianta, é dutes modeledes aldò dles crateristiches dla “volkstümliche Musik” todescia, sciche chela di Kastelruther Spatzen o de Hansi Hinterseher. Sce an ti ciala a les plates web dl “Verband Südtiroler Musikkapellen”, dl “Südtiroler Chorverband”, dla “Arbeitsgemeinschaft Volkstanz in Südtirol”, dl Südtiroler Künstlerbund” veiden che les informazions y finamai i inoms ofiziai é demé per todesch, ence sce ai à n grum de membri ladins. Perdret ne él nia normal che assoziazions che god de contribuc importanc da pert dla provinzia “rejone” demé todesch, ma cie che fej ciamò deplù demarevueia é che i membri ladins ne veid chilò deguna descriminazion.
Les infrastrutures condizioneia dassen nosc gusc‘, nostes simpaties, nosta mentalité, nosta identité. Al é na gran desferenzia sce na lia o na istituzion ladina depen da n assessour todesch o talian o sce ala pò se manajé ela enstessa. La storia dla scola ladina pita n bon ejempl. Canche ie sun ju a scola, dant 60 agn, éi emparé n grum de cianties popolares todesces, does ladines (“Na sëra sarëna” y “Os sotusc”) y una na taliana (“La montanara”). Les scoles ladines de Badia y Gherdeina fova laouta sot l assessour todesch y l “liber da cianté” fova l medem per i todesc y i ladins, l “Singend Jungvolk”. L’influenza linguistica y culturala dles infrastrutures se lascia adentene ence tl mond dl’economia. Nosc bacans, che vegn laudés sciche i garanc dl’autentizité linguistica ladina, rejona encuei de “Gülle” empede de “boacia” o “ega de stala”, o de “Grossvieheinheiten” empede de “unités de gran armenc”, avisa coche al ti vegn conté dant dai raprejentanc dl Bauernbund. L ann passé éi marené adum con n valgugn compagns te n agriturism a la Val. N valgugn se à comané n “höla” y l’ostira i à atira secodì; canche n auter se à damané n “té de faü” ne l à capì degugn, ence sce dlongia ciasa chersciòvel na bruscia de “faü”.
La cultura ladina moderna é dessegur plu independenta, creativa y daverta a les inovazions che la cultura popolara, ma ence nosc artisć, scritours y musizisć joegn à debujegn de sostegn finaziar y organisatif, donca de na infrastrutura. Ma per podei crié operes originales y fé conesce sies creazions adòrei lies, istituzions y provedimenc che se cruzie dantaldut de siei enteresc y bujegns y no de chi di autri. Con d’autres paroles: la cultura ladina à debujegn de autonomia y autodeterminazion. I joegn ne vuel nia se scluje ite te n vilin autartich; la varieté, l barat de idees, la sperimentazion y la colaborazion de vigni vers é la linfa dla cultura moderna. I ladins mess podei ei enstesc dezide olà chirì ispirazions, tla tradizion o tl “global village”; ai mess ei enstesc podei dezide da olà tò siei modei y programs, zenza messei se lascé dé dant da d’autri cie che ai à da fé; ai mess ei enstesc podei dezide con chi che ai vuel colaboré; ai mess ei enstesc podei dezidé co spene i scioldi che vegn metus a disposizion da la man publica. Autodeterminazion culturala vuel ence dì podei rejoné ladin con les assoziazions che i reverda. Autodterminazion vuel ence dì podei dì publicamenter la sia zenza messei temei che al vegne taié i contribuc o bloché la cariera.
L’istituzion de n assessorat a la cultura ladina y de na intendenza ladina a Bulsan é sté n gran vare inant y a dé de bogn fruc: l ensegnament dl lingaz ladin s’à mioré de truep, la scola ladina à encuei la poscibelté de crié material didatich y programs de formazion plu originai, plu ric y plu damprò dai bujegns dla popolazion. Ma sia autonomia é parziala: ala reverda demé i ladins de Südtirol y lascia tles mans dl assessorat todesch– al é rie da capì ciuldì – setours emportanc sciche les scoles de mujiga y l Museum ladin. L assessorat y la scola ladina porta emplù la merscia dla despartizion, sciche duta la Ladinia. I confins aministratifs arfera la cooperazion anter les valedes y deida pro a la formazion de realtés autonomes a livel de valeda; chestes ne renforza nia l’autonomia ma plutost la despartizion dla Ladinia. Nos on scoles ladines ma nia na scola unitara, nos on trei idioms adorés sciche “lingac ofiziai” te scola y tl’aministrazion, ma nia n lingaz scrit unitar per duc. I ladins ne à nia debujegn de miniautonomies o de normes desvalives per vigni valeda y ciampanil, ma de unité y de autonomia per la comunité entiera. La cultura ladina pò ester autonoma demé sce l’autonomia é panladina y ne depend nia da istanzes forestes, per nia dì dal partit de maioranza al govern a Bulsan, Trent o Belluno.
Erwin Valentini
(4)Al ne me plej nia
(0)1831 iadesc liet
Scrive n comentar a revert de "Bendebot de desfarenzia se manajé enstesc"