Enier él vegnù sclut ju a Cortina n auter vare emportant devers la candidatura de Anpezo per i Mondiai de schi alpin dl 2015, do ester jus fora a vuet per l 2013. Al se trata de na prejentazion preliminara che dess convence la FIS de ti sourandé i campionac a Anpezo y nia a St.Moritz/San Murezzan (CH) o a Vail/Beaver Creek (USA), tamben en gara. A Cortina d’Ampez fòvel vegnù organisé dl 1956 les Olimpiades, dedò él sté chiet con de gran manifestazions, tout fora les gares singoles de Copa dl Mond de schi.
Tla organisazion àn trat ite dutes les organisazions dl paisc, les istutuzions y les sozietés di implanc portamont. L projet é vegnù enjigné ca dal secreter general Nicola Colli adum a n valgugn colaboradours – anter chisc Giovanni Valle (che ti fova bele sté do a la candidatura per l 2013) – y spo cialé ju dal comité de organisazion, sostegnus dal assessour al turism y al sport dl comun de Anpezo, Herbert Huber. L projet preliminar ti é sen vegnù mané ite a la FIS. Rarejentanc ampezans y dles autres 3 stazions en gara, se encontarà empera ai 23 de setember 2009 a Zürich/Turic, per ti splighé i vantajes y les bries de organisazion de vigni pert. L iter jirà inant a Antalya (Turchia) ai 15 y 16 de otober y spo con n souraluech de na comiscion dla FIS de mei dl 2010. A Cortina se aspéten, sce an essa da avei la venta, bendebot de sburla per modernisé les strutures de acuei. Dant da puech àn ruvé i laours de restruturazion pro l stadion dla glacia. Sce la inclujion dles Dolomites tla lista UNESCO dles arpejons naturales dla umanité ti é ence de utl, él da vedei.
(0)Al ne me plej nia
(1)941 iadesc liet
Scrive n comentar a revert de "Cortina 2015: Copa dl Mond"