Coutes en souraplù

L istitut de promozion economica dla Ciamena dl Comerz de Bulsan (WIFO – Wirtschaftsförderunginstitut) à elaboré n stude finanziar che vegnirà prejenté tost ofizialmenter. Aladò de chest resulteiel – do l mote – clermenter che tla provinzia de Bulsan végnel paié ite deplù coutes de cheles che ruva endò endour te sies casses. Laprò àn ence cumpedé les speises per servisc manejés dal stat sciche polizia, ofizes giudiziars, strutures militares, ma ence speises per parlamentars y president dl stat. L souraplù dess se la rodé entourn ai 400 milions de euro. La provinzia  autonoma de Bulsan se enchedra amezite sun la sciala a livel nazional dles provinzies y regions che juta coutes devers Roma.

Chest stude dess ti dò definitivamenter l flé a chi partis politics te y fora dla provinzia che se scherza la bocia, dijan che la provinzia de Bulsan viv de privilegs y sun les sciables dles autres regions. Aladò dl statut de autonomia, de livel costituzional y garantì internazionalmenter, ti spétel a la provinzia de Bulsan de dert 9/10 (nuef diejems) dles coutes scodudes sun l teritore provinzial. L stude de Bulsan se cuer apresciapuech con n stude valif che la region Venet à lascé fé. Chest stude ne ti plej nia cis a la mandreta taliana Bulsan. La parlamentara Micaela Biancofiore à fat alsavei de volei ti prejenté na mozion al minister dles finanzes, Tremonti, per savei avisa ciuna che é la situazion. Ala se tol a dì che al ruva enfinamai endour l 137%.
L president de Ladins Dolomites, Albert Pizzinini, dij souraprò che tles valedes végnel tamben paié ite cotant deplù coutes de cheles che ruva endò a ben dla popolazion ladina. Te chest cheder él fosc d’utl recordé i 38 miliards de credit de vedles lires a la fin di agn ’90 a ben di ladins che l ex-conseier Carlo Willeit ova descorì demé pro l IPES (istitut frabiché alesiré). Sce degugn ne i essa fat avalei ne fòssei mai vegnus spenus a ben dl grup ladin.

Al me plej(0)Al ne me plej nia(2)

798 iadesc liet