Dejunis dant al mond

Sun la chestion dla cherta d’identité per ladin tol sen endò posizion la Generela. A nia ne à jové sia racomanazion fata alsavei de jené 2010 (ciala articul: cherta d’identité).

Tres chesta ti òven damané les istanzes competentes de garantì na unité dla mendranza ladina.
Chesta la posizion dla Generela, firmeda dal vize-president Marco Pizzinini: „En ocajion dla delibera sun l test ladin dla cherta d’identité volessa la Union Generela di Ladins dla Dolomites rengrazié  l govern provinzial dl Südtirol per avei azeté na forma linguistica en gran pert souralocala. Ala spera che chest dert ti vegne conzedù te curt temp ence ai zitadins ladins dl comun de Ciastel.
Desche travert per l dagnì ti damana la Union Generela ai responsabli politics de porté inant la proposta de na cherta de identité te trei lingac per duta la Region Trentin-Südtirol. Fina a dailò preia la Union Generela i responsabli politics de autorisé ence na cherta d’identité ladina per i trei comuns ladins dla provinzia de Belun Fodom, Col y Anpezo. Al fossa l prum dert, che duc i Ladins essa deberieda.
Con la cherta d´identité se prejenteia i Ladins al mond, perchel é l travert dla Union Generela da avei per dutes cinch les valades ladines una na varianta soula.
Ma endò n iade à mancé completamenter la  colaborazion y l dialogh danter  i istituc y les istituzions competentes. A la proposta de Fascia da mudé sia cherta te na forma unificheda ne à degugn responù. La enconteda che l diretour dl Istitut „Micurà de Rü“ ova empermetù a la Generela sun chesta chestion ne é nience garateda. Cie che la Union Generela ne pò nia azeté é la volonté (o enfinamai prescion) politich/istituzionala de crié per la cherta d’identité na varianta „mescededa“ danter Badia y Gherdëina. Plu che n laour „scientifich“ fossa chest la despartizion definitiva dles valedes ladines. Sce chesta volonté và inant, spo fòssel praticamenter istituzions ladines che laorassa per tegní despartis i Ladins dles Dolomites. Tolomei con si compagns da les ciamejes fosces essa na gran legreza con chesta situazion.“

Al me plej(0)Al ne me plej nia(1)

935 iadesc liet