Inant adum, o despartis?

Inant adum: „Prospetives per n’autonomia ladina“. Chest fova l titul dla relazion dl storich fodom, Ivan Lezuo, che viv a Bulsan.

La ladinité y la Ladinia de encuei é l resultat de n prozes, de n teriol lonch che l respidleia l svilup storich y politich de na comunité de mendranza. Chesta ladinité veid Lezuo empoieda sun trei seves: l’identité, l’unité y l’autonomia.

La pruma seva: la identité

Desche apascioné de storia y cis dla storia de Fodom meti avisa averda a cie che al suzed tla comunité ladina de mia val, da olàche al vegn mie pere, y tla comunité ladina en general. Datrai me enteni che per jì inant  ciàlen n fregul enzeruch y an veid che dantavia fòvel bele istituzions y tradizions che an podessa fé revive endò aldidancuei, samben con i adatamenc che auda laprò.

Na tel strutura é dessegur l Comun General de Fascia che tol ite la luegia dl Comprensore: na istituzion che degugn ne s’à inventé danuef, ma che à raijes sotes tla storia, na sort de autonomia tla autonomia  che al é vegnù dit. Al é sourafora na desmostrazion che la val de Fascia à na sia peculiarité, na identité da defene y da porté inant y da ti sourandé a les generazions che vegn do.

Drest dutes les vals ladines entourn Sela con Ampez à na sia identité de comunité, de val, che s’à formé ti secui.   “L’identité fodoma” per ejempl bele dl 1632 é definida en oposizion a les realtés vejines, todescia y taliana. Mefo che la definizion ne é nia na “autodefinizion”:

“Wir werden in Teitschlandt für wellisch, und gegen wellischlandt für Teitsche und also an allen orthen forestierj gehalten…“: chest desmostra che i fodoms ova na sia identité ence sce nia “autodefinida” (recorde chilò ence l proclam dl vescul de Persenon dl 1632 scrit per ladin fodom). Ai se desferenziova dai autri: per i todesc fòvei “Wellisch”, per i talians fòvei todesc y enlaouta conscidés forestiers da tramedoi.

Al é endertura y natural che al sie de chestes distinzions y de chestes identités „mendres“, ajache ales podessa renforzé na coscienza coletiva de ladinité. Al é mefo ence l pericul che chestes piceres identités de val saredes ite ti confins strenc, pernanche ales cresc de massa y ales va persoura (micronazionalism o sce i volon ciampanilism), arfere la reolida (=renforzament) de na identité ladina unitara.

Y chilò messonse se damané: ejisteiela chesta identité interladina o „panladina“? Y tant vedla éla pa? Les domandes chier na resposta ajache l’identité raprejenteia la pruma fasa te chest prozes y spo él mefo y purmassa ciamò persones che nieia daldut vigni unité storica ladina y vigni coscienza ladina storica, dijan che i ladins n’à mai abù na identité y na unité aministrativa.

Chesta mia resposta:

La Ladinia fova unida sot al teritore aministratif dl Tirol. Che al ne sie nia sté n raion aministratif ladin ne vuel nia dì che al ne fova nia elemenc comuns de identificazion. Chisc elemenc fova i ponc de contat te un o te n auter ciamp zenza mefo ji daldut a fil:

Fodom, Col y Ampez formova l soul distret ladin; Corvara y Calfosch fajova pert dl decanat de Fodom; entant la pruma vera fodoms, badioc, mareo, ampezans y plu tert ence gherdeines costituiva n batalion de scizeri; y spo fòvel i contac economics y l “barat” di prevesc.

Tl ciamp cultural fòvel l Ladinerverein a Dispruch che se cruziova de unì i za. 400 ladins che fova a Desproch. Vigni sabeda „Grödner, Enneberger, Ampezzaner, Buchensteiner und Fassaner“ dl  Ladinerverein se abinova tla ostaria “Roter Adler” a Desproch (Pustertaler Bote, 19 messel 1912). Ma l obietif fova chel de slarié fora ai ladins de Persenon, Bulsan y Maran. Cie che chest essa volù dì per l’identité ladina podonse se imaginé. La vera à arferé ju chest projet ambizious.

I volesse recordé te chest contest ence n pice ejempl de na bela festa popolara ladina, n pice segn de unité ladina ai 5 de aost 1879 a Corvara (tl Pustertaler Bote clameda “ladinisches Volksfest”). Al fova la festa dl primiziant signour Jan Pescosta. Te chesta ocajion é la messa vegnuda dita su sot al ciel brum dant a na gran clapeda de jent mai veduda enfin a enlaouta. An à sentù descore ti nuef dialec dles valedes ladines: i cater idioms dl distret de Mareo, i doi de Buchenstein (Fodom y Col), l bel lingaz de Ampez y l Gherdeina. Na bela testemonianza de na enconteda ladina ti agn critics dl “Enneberger Schulstreit”.

Do la minonga dl professour Bepe Richebuono l sentiment de popul ladin à metù man ai prums dl ‚800, lié ence a la insurezion contra Napoleon y contra i bavareisc, se desferenzian dai todesc per sie lingaz, dai vejins a sud, dai talians, cis per sia cultura y per la partegnuda al Tirol y a l’Austria.

Donca  él dagnora sté na entreciadura storica de identité ladina y identité tiroleisa, tant che zenza chesta partegnuda al Tirol de dutes cinch les vals, aldidancuei, y de chest sonsi convenciù, ne descoronse nia de unité ladina y de na Ladinia storica metuda adum da cinch valedes ladines. Demé sot al tet aministratif comun dl raion dl Tirol é i ladins de dutes cinch les vals stés bogn de svilupé chela identité che é ruveda enfin aldidancuei. Defat l referiment al Tirol o al Südtirol fova prejent te vigni ocajion, tl ‚800 samben, ma ence tles revendicazions ladines dl ‚900.
{xtypo_quote_right}Enscì pòn descrive en curt l svilup dla identité ladina: ti prums dejenés dl ‚800 bendebot tourbla ne garatòvela nia sciche chela todescia o taliana, tl ‚900 àla abù de burc contracolps desche la tripartizion, ma ala é empò spizoleda su y à metù man da florì. Al é aldidancuei n bel pré de ciofs mefoche i ciofs ne vegn  nia su duc canc compagns y enzaul él l pre dutaorela zenza floridura.{/xtypo_quote_right}La volonté de fé pert dl Südtirol à ciafé n gran renforzament tl 1920 canche an descorova de autonomia. I ladins, duc canc, da Ampez enfin Gherdeina, da Badia enfin a Fascia volova sté adum con i todesc te Südtirol per ciafé n’autonomia. Chest s’à repetù tl 1946 canche plu de treimile ladins s’ova abiné sun  jouf de Sela. Ence ilò àn tegnù aut tres l liam con Südtirol, liam auzé fora ence te n memorandum de Zent Ladina Dolomites ai aliés. Ma con Zent Ladina Dolomites s’àl slarié fora con plu gaissa ence y souraldut l sentiment ladin, ai à enfinamai damané na aministrazion ladina autonoma. Enultima tl referendum a Souramont à abù la dimenscion storica y la vedla partegnuda al Südtirol na gran valuta.

D’autra pert s’à chest raport anter identité ladina y tiroleisa tl ultim secul ence mudé. Da na identité tiroleisa-ladina él deventé na identité plu articoleda, demé ladina o ladina-tiroleisa o ladina-taliana o ladina-todescia. Chest raport tla popolazion ladina ne à nia plu chel peis desche al ova ti agn canche i ladins ova debujegn de se tegnì permez al Südtirol per ciafé na autonomia- con la ezezion aldidancuei mefo de Fodom, Col y Ampez.

Enscì pòn descrive en curt l svilup dla identité ladina: ti prums dejenés dl ‚800 bendebot tourbla ne garatòvela nia sciche chela todescia o taliana, tl ‚900 àla abù de burc contracolps desche la tripartizion, ma ala é empò spizoleda su y à metù man da florì. Al é aldidancuei n bel pré de ciofs mefoche i ciofs ne vegn  nia su duc canc compagns y enzaul él l pre dutaorela zenza floridura.

 

Seconda seva: l’unité

Do l’unité perduda tl 1923 Fodom, Col y Ampez à tres combatù che la reunificazion vae dalvers. Purmassa savonse desche ala é juda. Empermò l referendum tl 2007, aveniment sensazional per la Ladinia storica, à porté de nueves speranzes. Descore de unité ladina zenza chesta reunificazion sot a na medema region vuel di se encontenté de na unité demé nominala, astrata, cieze da niol. Y l niol ne tol nia la lum dl soredl. Per de plù é la reunificazion na condizion per ruvé a na gestion autonoma, comunitara y plu efizienta de dut cie che reverda diretamenter i ladins.
Dant da ruvé a la reunificazion pòn entant bele laoré per na maiour unité daite a vignuna dles cinch vals ladines. La val de Fascia à bele dé n prum vare emportant  tres la costituzion dl comun general. Ence per Badia y Gherdeina o Fodom y Col podéssen pensé a na tel strutura.

Sciche la val de Fascia à p. ej. ence Fodom y Col abù n tòch de storia dut sie: per trueps versc unfat a chela de Fascia, per d’autri desvaliva. Enscila à i fodoms les vejinanzes, Col les regoles. Fodom y Col à abù bele dal 1400 n sie statut, à tres cialé de podei mantegnì si derc y sies usanzes. Ai fova tegnus a una da na strutura aministrativa che fova la Herrschaft o l Gericht Buchenstein, l giudize de Livinallongo. Aldidancuei canche duc i comuns, mascima chi plu pici, ruva sot a les rodes de vigni sort de crises finanziares ite, él l risch che ai comuns ti  végnel tres deplù taié i mesi, mess cialé de ciafé sinergies y de mete a una servisc per podei sparagné. Fodom y Col gauja sie liam storich, che purmassa vegn tres plu debel, podessa se mete auna per na colaborazion plu strenta. I pense a les scoles che ta Fodom é do a vegnì saredes, i pense ai servisc che i doi comuns podessa gestì deberieda, conscidran sourafora che ence l davegnì dles Comunités Montanes ne é nia plu seguré.

Al fossa chest bele n prum vare per podei endò ruvé a chela unité anter Fodom y Col da zacan.

Per ruvé pro a chest él debujegn dla volonté dles aministrazions comunales y provinziales y dla popolazion: chest vuel di mete man delonch con l laour: sensibilisé, informé y convence.

N pice segn esteriour de chesta unité storica, y chilò enderezeie endò na proponuda ai raprejentanc di comuns da Fodom y Col, fossa chel de mete su les tabeles ai confins di doi comuns ence l inom todesch Buchenstein che aldidancuei é la unica denominazion ciamò adoreda per indiché l teritore de duc doi i comuns. Sourafora l fòssel ence na merscia da adoré deberieda per la promozion turistica ti Paisc todesc. Per chi che dij: ma al é n inom todesch y nos son ladins. L bel dla val da Fodom y de Col é propi chest trilinguism tla macrotoponomastica. Aldidancuei podéssen enjonté pro a la denominazion “Fodom-Livinallongo” y “Col-Colle Santa Lucia” ence l inom todesch de “Buchenstein” propi per sotligné chesta particolarité.

Dant de descore dla terza colona, l’autonomia, volessi enjonté pro n valgunes condizions per n renforzament dles prumes does colones: l’identité y l’unité:
1. Na conditio sine qua non, y i l dije endò, é l passaje de Souramont pro Bulsan, volù per auter da la popolazion con n referendum. Al é y  al restarà per dagnora na chestion de giustizia.
2. Na scritura unitara, element de discuscion bele tl ‚800, é na autra conditio sine qua non. Percieche l ladin p. ej. vegne tout su desche lingaz liturgich ofizial ence dal Vatican él debujegn de avei na scritura unitara. I ne podon nia pensé che la gliejia conscidereie vigni idiom ladin desche lingaz autonom.
Cie asenedes che al vegn fora canche al mancia na bona colaborazion onse vedù con la cherta d’identité: una per fascian, per Gherdeina y la Val Badia na autra, an ne sà nia cie verscion tò ca, Fodom y Ampez resta endò a bocia suta. Y al se trata demé de na cherta de identité!

{xtypo_quote_left}Sce tl davegnì i ladins essa da ruvé endò adum tla medema region, la lia di comuns ladins o n organism valif podessa se cruzié di problems da viginidì: tl sozial y tla cultura, tla economia, tla viabelité ez.{/xtypo_quote_left}Ciun lingaz tò ca él demé da se fè fora anter istituzions, linguisc’ y popolazion: LD o n idiom de val. I messon ti cialé a la chestion con obietivité zenza che l ciampanilism y l nazionalism de val ciafe la souraventa.

3. Na colaborazion plu podeoula y sota anter les valedes ladines. A livel cultural sonse bele ruvés a n bon pont (Istituc ladins, Museum ladin, desvalives manifestazions, media ladins-Usc, TCA, RAI…), ma a livel politich y aministratif messonse ciamò recuperé truep. I me augurasse ence plu colaborazion per cie che auda pro la viabelté sun i joufs.

I feje l ejempl dla lia di comuns che ie é dagnora vedù desche n organism fondamental per na mioura colaborazion, mefoche al mess avei ence n cert podei, competenzes cleres y ne ester nia demé n ent per ciafé contribuc. Souraldut ne podonse nia la vedei sciche na alternativa a la reunificazion.

La terza seva: autonomia

I ruve mia relazion con l’ultima colona, chela plu sotila y problematica, l’autonomia ladina. Dantfora n valgunes domandes: él nost travert na autonomia limiteda a les singules vals daite da les respetives provinzies y regions combiné con na valch forma de colaborazion soura i confins fora? O él na autonomia ideala o idealiseda, n bon argoment da tò ca te chestes ocajions per descore soura ma zenza na intenzion concreta da la realisé? O volonse enfinamai na provinzia autonoma ladina? O volonse avei n auter organism olàche les cinch vals pò se gestì autonomamenter? O volonse lascé dut desche al é sen?

Che al é meso de mete en pé na autonomia daite da l’autonomia vedonse con l comun general de Fascia. Ma él pa ence meso de laoré duc deberieda? Ie dijesse de sci, ma al é debujegn de atué una dles does condizions sine qua non dites endant: la reunificazion di ladins sot a na medema region.

Dedò pòn, aladò dl prinzip de sussidiarité y chest  vel per duc i comuns, ladins y nia ladins, mete en pé n organism souraprovinzial (Bulsan y Trent per se entene) che podessa gestì dut cie che reverda plu da vejin i ladins. Na strutura sciche la lia di comuns p. ej. o n auter organism da studié fora plu avisa. La lia, coche i é bele dit ,à abù l gran merit de ester n ent de utl: sciche organism souraprovinzial àl podù asnelì la chestion di finanziamenc per l istitut cultural Cesa de Jan. Sce tl davegnì i ladins essa da ruvé endò adum tla medema region, la lia di comuns ladins o n organism compagn  podessa se cruzié di problems da viginidì: tl sozial y tla cultura, tla economia, tla viabelité ez. Gherdeina, sce ala vuel, reste pro la Bezirksgemeinschaft de Bulsan, Badia pro chela de Puster, Fodom, Col y Ampez formassa na Bezirksgemeinschaft ladina desche la Bezirkshauptmannschaft Ampezzo dl 1868 al 1918.

Plu critica y problematica veidi  na provinzia ladina, desche ala vegn datrai n iade  proponuda.

Per prum: damané na provinzia ladina vuel dì pregiudiché l passaje de Souramont pro la region Trentino-Südtirol. No Trent no Bulsan ne dijarà de sci a la reunificazion a chestes condizions. Ence Gherdeina y Badia se para dassen, ajache al vegnissa molé fora l liam storich con Südtirol (sceben che na provinzia ladina fossa daite da la medema region). Chilò ruva doprò ence na componenta emotiva. Ie posse ence capì, ajache chest liam storich con na realté desche chela sudtiroleisa (con dut cie che al é vegnù arjont dal 1945), mess vegnì respeté.

Secont: chi che dij che con la provinzia ladina tòlen demez n “fal” che é sté chel dla despartizion di ladins se fàlen: la ingiustizia é steda chela, y al é vegnù dit dai ladins enstesc sie do la pruma che do la seconda vera, de ester vegnus destachés dal Südtirol y per chest ence destachés dai autri ladins. Con la provinzia ladina metonse man a na autra ingiustizia che portarà a na revendicazion nueva te 40, 50 o 100 de agn.

Terz: te chisc temps, olàche lonc y lerch él debujegn de sparagné, descòren enfinamai de tò demez n valgunes provinzies. Y da nos en él de chi che vuel istituì na provinzia nueva?

Y enultima: sce i ladins vegn reunifichés sot a la medema region, ne él nience plu debujegn de istituì na provinzia ladina.

Sce i ladins sarà bogn de laoré inant deberieda a renforzé chestes trei seves; identité, unité, autonomia, spo sonsi segur che ai arà n davegnì. I scluje ju chilò ti aodan al comun general de Fascia n bon laour y na pruma senteda tl spirit de unité.

1404 iadesc liet