Ladins deberieda con Bulsan

La desfileda a recordanza de André Hofer y dles veres de liberazion dl 1809, encuei a Desproch, se à dejout do la rata en pesc. Al fova da vedei valch linzuei con la scrita „Los von Rom“ (Demez da Roma), „Autodeterminazion“, „Ein Tirol, ein Ladinien“, la corona corida con rueses, ma ence la bandiera europeica amesa i 23.000 scizeri che variova al son dles mujighes tres les stredes dla zité. Al vegn raté che al fova entourn a 100.000 spetadours a ti cialé pro a la manifestazion storica. Les unions culturales ladines de souramont se à tout pera na bandiera ladina con la scrita „Wir getrennten Ladiner wollen zurück zu Bozen“, depierpul che i scizeri à porté la scrita „Ein Tirol, ein Ladinien“ sun i colours tiroleisc cuecen-blanch. Bendebot de partezipazion ence dal Trentin, olàche al floresc ti ultims agn n pue dlonch compagnies de scizeri.

La „clapeda“ ladina fova componuda dai scizeri de Mareo, de Anpezo y de Fodom, con na veta foscia sciche segn dla despartizon di ladins y dl Tirol.  Chestes compagnies de scizeri fej perdret pert dla „bacheta“ de Puster, ma te chesta ocajion ései marcés te na „formazion ladina“.

„Wir getrennten Ladiner wollen zurück zu Bozen“ (Nos ladins despartis volon jì endour pro Bulsan), scrit sun la bandiera ladina,  recorda l slogan dla gran manifestazion sun l jouf dl Sela dl 1946 che reclamova enlaouta l medem dal stat talian. I ladins é endere vegnus „ciastiés“ doplamenter: empruma tres la despartizion sun trei provinzies y does regions y dl 1964 con zaré demez les plovanies de Ampez, Fodom y Col da la diozeja de Persenon per vegnì metudes permez a la diozeja de Belun. Unité ne él encuei nience plu anter i scizeri ladins: chi dla Val Badia sostegn dassen i ladins da souramont, depierpul che chi de Urtijei se fej ert da reconesce no demé na bandiera ladina, ma ence i ladins fora dla provinzia de Bulsan.

{2jtabs_plugin 2}

Al me plej(0)Al ne me plej nia(1)

621 iadesc liet