I ombolc ladins se en à entenù che i conc con Bulsan ne stimeneia nia y con rejon se féjei audì, portan inant l descurs dl miorament dla viabelté tles y anter les valedes ladines. Al vuel ester zirconvalazions a Urtijei, Selva, Corvara, La Ila y Lungega. Al é da pensé concretamenter a la realisazion de n tunel de coliament anter Colfosch y Selva. La viabelté tles valedes ladines dess vegnì veduda globalmenter y chilò él da auzé fora ciamò n iade la funzion dla Lia di comuns.
Da pert dl assessour Mussner y dla provinzia vuelel ester respostes cleres sun i temps de realisazion, zenza indicazions generiches de 15-20 agn desche per la zirconvalazion de Selva, che ne é nia auter che toutes per l cul. Te 5-7 agn dess chisc projec, sce al é la intenzion, vegnì realisés. De chest vers se aspeta Ladins Dolomites na resposta clera da pert dl assessour Mussner (finanziarà pa la provinzia chestes oures ti proscims agn?)
L president dla jonta provinziala, Luis Durnwalder, à dit che al é da sparagné y che ti proscims agn vegniràl sparagné sun les gran oures anter cheles che al toma ence ite les zirconvalazions. Chest ne dess nia sprigolé i ladins che da agn bele tira a la curta con la provinzia de Bulsan y che con Badia y Gherdeina contribuesc en gran pert ence al inom de Sudtirol tl mond. Respostes cleres và de uega ence per pensé a d’autri trois per la realisazion de chisc projec. Da n pont de veduda politich dess na resposta negativa la clareza che se lascé sun la SVP ti é de dann ai ladins y ne porta nia auter che messei sostegnì l rest dla provinzia con nostes coutes.
Albert Pizzinini, Ladins Dolomites
(0)Al ne me plej nia
(1)730 iadesc liet
Scrive n comentar a revert de "Laoré inant pro les stredes"