Lois Trebo: ie spere che tert o adora veiden ite

L memorandum metù adum da Erwin Valentini y Lois Trebo tol ite na schira de revendicazions. Valch unes  vegn tamben dant te truepes ressoluzions y petizions dla Generela. Valch autres é daldut nueves, dantaldut cheles de natura plu politica, cheles sun l lingaz scrit unifiché o cheles che a da en fé con i ultims svilups. L memorandum se enchedra adretora tla discuscion sun la reforma dl statut de autonomia che peia via y deida fosc sclarì les idees sun les tematiches ladines. I jon ite plu avisa sun valch ponc, metan man con na intervista al dr. Lois Trebo, firmatar dl memorandum.

Intervista a dr. Lois Trebo

Una dles prumes ghiranzes, la ghiranza uma de dutes cantes, da tres y sen ence tl Memorandum é la reunificazion di ladins tla medema region/provinzia. Ma de chesta ne él da spié net nia tla discuscion anter todesc y talians tl cheder dla Convezion. Ciodì pa tant puech enteres, condut l resultat referendar dl 2007?

I responsabli politics di comuns da Suoramont à gonot traté chest argoment y ti l à porté dant a les autorités de Bulsan,Trent, Aunejia y Roma, ma empò él puech che se muev. I savon che Aunejia é decontra ajache l Veneto ne vuel nia lascé ca Ampez. Al é da pert di senatours dla SVP vegnù prejenté na lege sun chest argoment, ma dut sta chiet. Ma al é ence da dì che i ladins enstesc, chi de Gherdeina. Badia y Fascia, à plutost la fiaca;  la Lia di comuns ladins, che per statut messessa ester la pruma a se cruzié de chesta ghiranza, ne à dé nience n bot.

Ie rate che i governs de Bulsan, Trent y la Region messessa dé sie bonarat y desmostré enscì che ai é a una de sourantó Souramont. Sce Roma essa de tel deliberes tla man, rati che la cossa vegnissa desblocheda; al é da se aodé che l parlamentar ladin se dae plu da fé  per arjonje che nosc cujins da Souramont posse endò vegnì a fé pert de Südtirol. Chesta é na chestion de fondamenta, de prinzip. L sourastant de Südtirol à dit che la politica de Südtirol dess vegnì valuteda aldò che Bulsan trata i ladins. Fin a ciamó ne podonse pa ester contenc.

L ladin standard é gnù metù da na pert ofizialmenter. Ence te Fascia ne végnel nia adoré. Eise ciamò speranza che la situazion se desblocheie y cie messàssel pa suzede?

Zachei à dit che l ladin standard ne à per l moment deguna “chance”,  an mess aspeté la generazion nueva. Ie ne fosse nia tant pessimist. Ie rate che l assessour Mussner – o chi che vegnirà do – veide ite tert o adora che al á fat n gran fal con la delibera dl 2003 che scluj fora l ladin unifiché da l’aministazion publica de Bulsan. Duc i gran linguisć é dla minonga che na picera popolazion che à 5 idioms à debujegn de n lingaz scrit unitar da adoré ti documenc y tles comunicazions che reverda plu de una na valeda. Ie pense che le Istitut Ladin, che ti ova dé chest consei a Bulsan, ae vedù ite che al à falé; l diretour m’ova dit a mi che al ne fossa nia sté debujegn de na delibera sun chest tema. Che la politica à tout tles mans l ladin unifiché é steda na burta cossa; la scienza y la cultura ne podessa mai se vene a la politica. Ie dije che l ladin unifiché dess vegnì adoré da duc chi che scriv articui che enteresseia deplù valedes ladines y che rata che chest standard deide lié adum deplù i ladins. Do chindesc agn jìssel samben debujegn de na revijion critica y de enjonté paroles y terminologies nueves.

N post de osservazion dl lingaz ladin, co ves imagineise pa concretamenter valch da de tel?

La funzion de n tel post é de osservé sce l lingaz ladin vegn/ne vegn nia adoré olache al é scrit dant da la lege, y co che al vegn adoré te constesć desvalifs.  Chesta funzion  dess ester tles mans de na persona esperta dl ladin; ala dess analisé i documenc dl’aministrazion y i articui che vegn scric y  ence cie che an auda ti media y spo se noté su cie y co che an podessa dì o scrive miec y spo ti l comuniché a chi che podessa l adoré. I todesc à bele da agn n tel ofize senté ite tl “Südtiroler Kulturinstitut”, al se clama “ Sprachbeobachtungsstelle”. Ie veide n tel post de gran debujegn, ciuldì che l ladin che an auda y liej é gonot dret a pe zot.

Toponomastica: ne é la ghiranza de esonims ladins nie n pue ghiré demassa. Ne fòsssel nia bele truep, p.ej. che al gnissa scrit su sun les tofles fora dles valedes ladines ence l inom per ladin, p.ej. a San Laurenz “San Martin de Tor” o “Jouf de Frera” y nia demé “Grödner Joch-Passo Gardena”?

Chesta ghiranza me sà a mi na cossa daldut normala, bele per l fat che i talians y i todesc à ence te nosc paisc si inoms talians y todesc; cialede demé a les chertes y tofles tachedes fora entournvia te nosc raions. Ence pervia che al viv foradecá te paisc todesc y en pert talians cotant de ladins, messéssel ester l dovei de chi comuns de scrive su i inoms di posć – chi che à inoms ladins – per ladin, ence per respeté la mendranza ladina, la popolazion plu vedla de Tirol. Chest vel dantaldut per Bulsan, la capitala de provinzia y donca ence di ladins de Südtirol.

 La Lia di Comuns ladins fova gnuda laudeda desche na seconda “Union Generela”. Ti eise pa creta te chesta assoziazion y cie podéssela pa fé?

Na lauda nia cis senziera; al en fova ence de chi che pensova de adoré la Lia en funzion anti “Union Generela”. Coche ala side, al me desplej dassen che ala ne s’à bele da trueps agn nia plu abiné, scemia che al fossa n grum de temesc da traté che reverda dutes les valedes ladines. L fin de chesta lia fossa pu de laoré plu adum anter i ladins, traté temesc deberieda sun l ciamp politich – cultural y nia demé dl trafich. An spera che al vegne metù n president nuef che ti dae vita a chesta istituzion tant emportanta. Enlaouta che ala fova vegnuda metuda su con la sburla de Durnwaler él pu gnù miné che ala  laorassa per la comunité de duta la Ladinia y fé dles dutes che i ladins se mantegne unis y che Souramont ruve pro Bulsan. Chesta fova dl 1984 ence steda na aodanza dl sourastant de Tirol Eduard Wallnöfer.

Radio y televijion. Tres la ultima convenzion él gnù dé bendebot de varesc inant. Olà podéssen pa mioré?

La RAI ladina podessa aumenté les ores de trasmiscion de n valgunes ores al di per ti tegnì bot al grumon de media de lingaz forest che vegn vigni di da porta y da finestra ite tles stues ladines. L radio y la televijion à na gran emportanza per l souravive dl lingaz y dla cultura ladina, ajache truepa jent scouta chisc mesi; sce les trasmiscions é fates endertura pò vigni ladin emparé cotant, ence da rejoné plu bel ladin. Per podei mioré la cualité dles trasmiscions ladins y per slarié fora les tematiches tratedes jìssel debujegn de plu personal cualifiché: per produje programs originai ladins o per sincronisé films y programs touc da foradecà. Ideal fòssel ence che an essa tles valedes ladines sezions dla RAI ladina per avei trasmiscions plu fresces y damprò da la jent.

5066 iadesc liet