Mantegnì l gherdeina con l todesch

Che la SVP de Urtijei, che dij de ester „ladina“, mana fora envic per la seira de informazion ( Wahlversammlung ) demé per todesch, ne me essi nia aspeté. Bel per respet al candidat de rejoneda taliana che ei à sun lista, messessa n tel envit vegnì scrit te dutes trei rejonedes.

Mané fora n envit a na seira de informazion demé per todesch me sà na gran contradizion, a pensé che a Urtijei él passa l 80 % dla popolazion che se à declaré ladins pro la cumpeida dl 2001. Pona él ciamò na majera contradizion tla propaganda che i candidac dla SVP à mané encantourn; la candidata Marlies Moroder dl Mirjam scriv te sia propaganda: „Dass wir weiter unser Grödnerisch und nicht „Dolomitan “ sprechen können“.
Che a la SVP ne ti scùsel nia l Ladin Standard, o coche ei l clama „Dolomitan „, savonse ben, ma scrive per todesch che ai vuel mantegnì inant nost „Gherdeina“ é ben bendebot da rì. Sce ela essa almanco scrit per gherdeina pona pò un ester a una o no, ma scrive per todesch na tel frasa é veramenter na contradizion che majera ne podéssela nia ester! Pona volessi ben ti damané a Marlies Moroder y a la SVP: „Chi ves proibesc pa de rejoné y scrive gherdeina?“