N dilan de cuer a Erwin Frenes

Erwin Frenes tol comié da la redazion ladina dla RAI, senta de Bulsan, do feter 40 agn de laour y va en pension. Te duc chisc agn àl contribuì dassen y dezisivamenter al svilup dles trasmiscions ladines te radio y televijion da Plaza Mazzini a Bulsan demez. Ester jornalist é sia vita y chest ne mudarà nience sen che al va en pension. Con sia ousc clera y sterscia auda Erwin Frenes pro les persones plu conesciudes tla Ladinia. Trueps ascutadours arà mancia sia persona, si bel stim,  sia pascion y dantaldut sia coriosité sciche jornalist.

Erwin Frenes é nasciù dl 1952 a La Val tla Val Badia y é ruvé pro la RAI a Bulsan do si studes linguistics a Verona, olàche al sté duta sia vita profescionala. Al ne é nia meso de descrive te n pèr de risses duc i gran meric che Erwin Frenes s’à fat per les trasmiscions ladines. La RAI ladina à fat tres bendebot de svilup y Erwin Frenes à dal meteman encà filé la acia y abù n gran peis. Empruma fòvel scempl ideadour de programs, spo jornalist y dal 2013, do l’ampliament dles trasmiscions y la creazion de na redazion autonoma ladina, él  zapé ite sciche diretour a cef dla sezion ladina dla RAI. A la fin de auril 2016 é sen na era juda a fin.

Erwin Frenes à dagnora araté che i massmedia é una dles massaries plu emportantes per l svilup dla coscienza ladina; ai deida crié identité, desceida sentimenc, mostra su ponc critics, fej aorela curta y é na fontana de impulsc tres nuefs. Per Frenes ne porta i mass-media nia demé pro a informé la jent, ma ai deida ence a conduje adum y fé sentì la comunanza ladina danter dutes les cinch valedes. Te chest sens se à Erwin Frenes tresfora aficé, tignan alaut i valours democratics y fajan con coraje n jornalism soura i partis politics fora, personifican tl dret sens dla parola  „n jornalism autentich“. Ai ascutadours ti fòvel atira dret cler che al microfon él zacai che sà de cie che al rejona, un che personificheia  statura y credibelté y che sà avisa cie che an se aspeta da la radio-tv publica.

Enceben che Erwin Frenes va sen, do prest 40 agn de servisc, en pension, restaràl inant persona de referiment. Ne messei dadoman nia plu levé y pié via al laour, ma podei levé y naouta fé les cosses che ti plej,  chest ti aodonse decuermenter. Da duta la Ladinia ti vàl n “giulan fort” per l laour regù fat te duc chisc agn. Dut l bon!

Dr. Giovanni Mischì

Al me plej(3)Al ne me plej nia(9)

1875 iadesc liet