Ne onse emparé nia?

Sce l fascism  à  fat  dessegur  n grandiscim fal de volei mudé  y batié da nuef la gran pert  de nosc luesc,  montes, valedes, lec  y enscì  via, é sen  i  todesc  che  fej avisa  i medems  fai. Ciuldì ne pon pa nia do 80 / 90 agn lascé  i inoms  coche i son usés ai  clamé, i todesc ti  dijarà  for inant sie inom todesch, nos ladins ti dijaron inant a nostes montes y contredes for mo l inom  ladin coche nosc peresc nes l à tramané, y ai talians déssen mefun  ti lascé si inoms  coche ai é usés da i clamé.

La Provinzia o chi che à da comané te chest caje,  ne toca  a deguna maniera  da vegni  ca  sen  con sia  forza ( che é en sostanza i scioldi che  ai  giata  da  Roma,)  y finanzié   passa  60.000 tofles nueves (demé per todesch)  su per les montes  de  Südtirol.

Sce l moviment politich  Ladins  Dolomites à tout posizion clera  contra  chesta politica de  todeschisazion,  spo  an abù rejon,   tant  deplù  che  i vivon  tles  Dolomites che é da puech vegnudes  toutes su  tla UNESCO  coche patrimone da  salvé.

Che al vegne demé rejoné todesch  te n tel  raion ne é nia da pretene  y nience dret, la UNESCO é na organisazion  dla  ONU y coche i savon végnel ilò rejoné dutes les rejonedes de chest mond. Ciuldì ne tol pa nost assessour Mussner  nia posizion  publicamenter per chesta  cossa? Èl pa el  a una  con chesta politica  nazionalistica porteda inant da zachei bel a chiet via? Ence chilò da nos  él tofles dl AVS  demé per  todesch coche da vedei da la  fotografia  enjonteda  (50 m defora  da  Dumat ) sun  Troi  da la  posta.

Marevueia me fej  perchel  ben  ence l articul contra  l Moviment Ladins scrit da  na persona de Ciastel Mulser  Fabian, ( Dolomiten 4 de Setember 2009 ) bonamenter él  el ence  un de chi che vuel les tofles da mont  su  demé per todesch. Ti cialon demé n puech  a la  realté  de encuei!

I vivon te n raion adum con 3 grups  etnics y souraprò ciamò truepa jent da duta la Europa  che é vegnuda  a sté chilò te  Südtirol, ajache l’industria dl turism adora chesta jent, i savon ence che aldidancuei viv  l turism dantaldut di ghesc‘ talians. Les Dolomites é dret da puech  vegnudes  reconesciudes sciche “Patrimone dla umanité “ da la UNESCO.

Ne él pa encuei  l comportament  dl AVS con  sies tofles demé per todesch  (demé dinrer  vedonse na tofla  per Ladin ) nia na desmostrazion  de aroganza y de prepotenza  y provocatif  ti confronc de  chi che ne é nia  de rejoneda  todescia? I on for  audì rejonan dla aroganza  fascista che à talianisé  i toponims, ne onse  propi emparé  net  nia da la  storia,  volonse sen demé ti  la rete  con la medema moneida? Rata  pa nosc  politics propi che chesta  sie la dreta streda da tò? Mienen pa che chest sie  l dret meso  y n bon ejempl per  na convivenza pazifica  te nosta Provinzia?

Georg Moroder

Al me plej(0)Al ne me plej nia(1)

669 iadesc liet