Rumanc grijon te scola

I mesi nuefs de ensegnament tl standard scrit „rumanc grijon“, moderns y plajoui, vegn entratant aplichés te entourn a 40 localités grijoneises, da la Val Müstair, al Grijon zentral enfin a tla Surselva, oben te entourn a 50 percent dles localités rumances. Al se trata dles scoles de cheles localités che à tout la dezijion de introduje l rumanc grijon (ladin scrit unifiché tla Svizra) te scola dal 2009/10 y de cheles che fova judes dantfora tl ann de scola 2007/08. Souraprò vàn inant con la formazion de istrutours che ti sta permez a les localités pionier con introduje l standard scrit rumanc grijon. Plu inant vegn la introduzion de gre en gre concialeda y valuteda da la université y da la scola auta de pedagogia de Friburg.

Tla Engiadina, Val Schons (Grijon zentral) y te pertes dla Surselva che ne à nia ciamò sourantout l rumanc grijon te scola  é l govern dl Grijon do a chirì soluzions tres n projet de mediazion con les autorités scolastiches locales y la popolazion per renforzé la capienza vizendoula. Chest prozede à bele dé ca valch resultat positif. L obietif é chel de introduje damprovia l rumanc grijon te dutes les scoles rumances. Les regoles per l standard scrit grijoneis é vegnudes ideedes dl 1982 sun la basa di idioms da pert de Heinrich Schmid che à ence definì les regoles per l ladin standard dolomitan. Demé che ti Grijons àn fat de gran varesc inant, chilò l à depierpul l Istitut Micurà de Rü  enfinamai tout demez da si projec scientifics. Daven dal 2001 é l rumanc grijon lingaz ofizial dl Cianton Grijon y dal 2007/08 végnel ence apliché con suzes sciche lingaz de alfabetisazion.

{2jtabs_plugin 1}

{jcomments on}

Al me plej(0)Al ne me plej nia(1)

1017 iadesc liet