Scola ladina: LD cuei adum firmes

Aladò dles intenzions dla jonta provinziala dles cater direzions atuales de scola auta tles valedes ladines nen déssel da d’auton demé plu ester does, una a La Ila y una a Urtijei olàche l’ITC, la Scola d’Ert Cademia y la Scola profescionala tomassa sot a na medema direzion. Sce al é ciamò azetabel che la scola profescionala vegne acorpeda a la scola d’Ert ence per la parentela anter chestes scoles ne él nia poscibel volei ence acorpé l ITC Raetia y fé na direzion soula.

L prestisc y la cualité dla scola ladina patissa dassen. Da dì él ence che enscì perdessa i ladins l 50% dles direzions. La scola todescia y chela taliana endere vegn plu sconedes. La scola ladina se damana de mantegnì 3 direzions autonomes (ITC La Ila con lizeo, ITC Urtijei y Scola d’Ert Cademia adum a la scola profescionala). Per cie che reverda l ITC Raetia de Urtijei vàl debujegn de fé laprò valch autra consciderazion. Dant da n valgugn agn, dlongia a les sezions IGEA y Turism él gnù pié via con l projet de na sezion nueva IGEA sport che permetessa de ti jì plu encontra a les esigenzes di atlec che podessa enscì resté  te val. La domanda é steda atira grana, tant che do apeina 3 agn él stè da d’auton 26 iscrizions tla pruma classa. Enscì él sté l ITC Raetia datant da realisé cie che da plu pertes gnìvel damané bele da agn. L problem é dagnora sté endere l sostegn deblot da pert dla jonta Provinziala che à vedù tl model n pericul per les scoles sportives de Mals (Damal) y Sterzing y n pericul per l model de scola todesch, ajache la sezion Igea sport che é scola paritetica é steda dagnora ence bona de enzaludé adalerch studenc da fora dles valedes ladines.
La dotazion de ores a l’edema dl ITC Raetia é de 460, depierpul che per fé 15 classes despartides nen jìssel debujegn de 540, zenza raté les cooprejenzes che te valch caje é nezesciares. Chestes 80-100 ores deplù ne vuel la jonta a Bulsan, aladò dles intenzions, nia plu aloghé. La vertola dl messei sparagné é massa scempla y ne ciafa nia giustificazion, tant deplù che tla scola todescia y taliana ne él nia gnù scurté tant. En plu se tràtel dla scola de na mendranza che à ciamò na majera emportanza. Pechel vàl debujegn dl’azion de vignun per defene una dles seves de nosta cultura. Ladins Dolomites (LD) à organisé na recoiuda de firmes a sostegn dla scola ladina. Chest ti permetarà spo ence al assessour a la scola y cultura ladina Florian Mussner de porté dant con plu forza les ghiranzes dla scola ladina.
Les firmes pò gnì dedes ju pro i raprejentanc de Ladins Dolomites tles valedes ladines. Souraprò pòn dé ju les firmes:
tl Bar Aaritz a Selva (Claudia Bertuolo Prinoth);
tl Art Cafè a Urtijei (Kostner Rudi);
tla senta dla LISE Woodcarvings a Santa Cristina, streda Gherdena 17 (Livio Senoner).

An pò ence contaté diretamenter Ladins Dolomites per informazions plu menudes tres l sit
http://www.ladins.biz (sot a: preibel contatedenes).

Al me plej(0)Al ne me plej nia(0)

789 iadesc liet