Sconanza dla mendranza y sconanza dla natura

Michil Costa criticheia te “La Usc” dai 26 de fauré che l Memorandum ne spen nience na parola sun l ambient. L’identité ladina à dessegur ence da nen fé, sciche al dij, con la contreda, dantaldut con la contreda culturala; i luesc da paur, les viles, i prés da mont, les montes (pastures) é frut dl laour de nosta jent; ai é la fondamenta dles tradizions ladines. Chesta locia vegnirà corida te na verscion nueva dl Memorandum. La “Sintesa”, publicheda adum con l Memorandum, damana perauter mesures de sconanza per la natura y les Dolomites.

Nia tant segur sonsi sce la sconanza dla natura ae da en fé diretamenter con la sconanza dles mendranzes. La natura é n ben de duc; les Dolomites ne é nia o nia demé patrimone di ladins, di todesc, di talians y di furlans, ma patrimone dl’umanité entiera. La sconanza dles Dolomites sta perchel “in primis” sot l’autorité dl’ UNESCO.

Na chestion n puech desferenta é chela di joufs ladins. I son duc a una che l “horror motor show” mess vegnì archité a valch moda, ma i joufs ne à per i ladins nia demé na emportanza economica y ecologica ma ence soziala. Les valedes ladines é dagnora stedes liedes adum tres i joufs; tres i joufs ales baraté fora bens materiai y cultuai y conservé sia identité linguistica y culturala. L “motor show” é l resultat dl’industria dl turism y perchel mess na limitazion al trafich vegnì chirida da chela pert. Nost pice mond ladin, che é bele despartì da confins politics y aministratifs, à ence encuei debujegn che chesta via de comunicazion reste daverta a nosta jent.  Sce la limitazion a la zirculazion é n “conzet surpassé” aspetonse propostes alternatives concretes che tegne cont de duc i aspec dla chestion.

L Memorandum ne é no complet, no esaustif y ciamò demanco la verité assoluta, ma na plataforma de discuscion. Vigni critica y proposta alternativa é benveduda; l sostegn al Memorandum pò ence vegnì dé con reserves sun chel o chel auter punt, gen ence da Michil Costa.

Al me plej(2)Al ne me plej nia(1)

2714 iadesc liet