UNESCO: a rodul

Raprejentanc dles 5 provinzies de Belun, Pordenon, Udin, Bulsan y Trent se à enconté enier  tl palaz Piloni a Belun, deberieda con i assessours regionai Oscar De Bona (Venet) y Roberto Molinaro (Friul-Venezia Giulia), per sclarì les chestions entourn a la Fondazion Dolomites-Unesco. Al é vegnù tout la dezijion de mete en pe, dlongia l consei aministratif, ence n consei diretif che tol ite, souraprò a les provinzies, tamben les regions Venet y Friul-Venezia Giulia. L consei de aministrazion depierpul é demé componù da les provinzies che sourantol enciaries operatives y esecutives.

Degunes discuscions longes plu sun la senta aministrativa dla Fondazion: ala dess rodé vigni trei agn da provinzia a provinzia, alfabeticamenter. Vigni provinzia sourantol te chest temp a rodul ence la presidenza. L assessour al ambient de Bulsan, Michael Laimer, à lascé alsavei che la EURAC metarà dant n conzet de svilup turistich per la proscima enconteda dla fondazion che é veduda dantfora ai 26 de otober 2009. L proscim vare é chel de crié ence la „merscia UNESCO“.  La dizion ladina „Dolomites“, proponuda da Reinhold Messner, à de bones poscibeltés de deventé la dizion ofiziala, dantaldut ajache ala é unfat a chela engleisa. Al dess vegnì scrit fora n concurs internazional.

Dret critich enchedra Albert Pizzinini de Ladins Dolomites les intenzions dl assessour Laimer de loghé pro la Eurac (Academia Europeica) a Bulsan la senta a rodul dla fondazion Unesco per les Dolomites, ence do che duc i esponenc dla SVP ladina se à ghiré la senta tla Ladinia amesa les Dolomites. „La volonté de Laimer nes lascia a bocia daverta“, enscì Pizzinini che se damana: „Ne conta la SVP ladina a Bulsan propi nia de nia?“.

Al me plej(0)Al ne me plej nia(1)

654 iadesc liet