Topo-stritoz samont

I „scrais“ de chisc ultims dis entourn a les tofles demé per todesch metudes su dal AVS (Alpenverein Sudtirol) su per les montes é i ultims de na seria de svais ti ultims agn. Samben scràien dagnora demé canche ala và de sie sach. Canche ala và y jiva p.ej. dles istruzions a les medejines per todesch (oblientes) o dl nia respet dl bilinguism pro la posta y polizia ne se muev degun talian. Degunes plates entieres sun l Alto Adige. Di ladins ne rejònen mé nience.

Ma chest iade  mess ence l AVS amete de s’avei astilé da encomper. Toponims a pert, al ne vegn nience plu dé per talian na indicazion dla funzion de n troi (troi panoramich, roda, biotop ez.) o la indicazion  scempla a na stazion dles corieres (demé plu „Haltestelle“). La jonta provinziala à perchel messù empermete enier de dé n vare endò y dì che al vegnirà cialé do. Ma i inoms tolomeics ne vegnirà nia plu restabilis tla micro-toponomastica empermet Luis Durnwalder. Chest pèrel che ence i politics talians mete man da azeté. Da noté él che Durnwalder à trat ca tla chestion ence les valedes ladines, dijan che degugn ne à abù da dì valch dla microtoponomastica ladina tles valedes ladines, per cie pa spo de chela todescia?  Un n toponim soul y chel originar é mefun empò plu dret y natural che traduzions emponudes.
L Alpenverein Sudtirol (AVS) à metù su te dut Sudtirol na rei de amerscia-trois nueva tl cheder de sie „Suedtiroler Wegeprojekt“ (www.trekking.suedtirol.info) con mesurazions gps sostegnudes da satelit. L projet é vegnù finanzié da fonds dla Union Europea, da la provinzia de Bulsan y dal stat. I micro-toponims talians (dl prontuar de Ettore Tolomei, ofizialisés dal fascism) é conseguentamenter vegnus lascés demez.
„Les ultimes polemiches sun la toponomastica é bendebot strumentalisedes y ne fej nia auter che dann a la convivenza anter i 3 grups etnics“, dij Albert Pizzinini de Ladins Dolomites, enjontan che „sce la talianisazion di inoms, sciche dutes les cosses sforzedes, é na plaia sota gaujeda dal fascism, vàl debujegn da dì che te na tera turistica é tofles plurilinghes deventedes comedoules per gran pert de turis’c talians.  Al và empò debujegn da chirì na soluzion che acontenteie duc, che ne pò nia ester na autra che indiché gran y gros l inom originar y dessot l inom ti autri 2 lingac de Sudtirol y chest soura dut Sudtirol. Enscì éssen finalmenter na toponomastica che tol en consciderazion duc i 3 grups linguistics sot a la merscia de na convivenza moderna“. „Ence dal pont de veduda pratich é chesta la mioura soluzion, na toponomastica monolinga criassa demé confujion anter i turisc‘ che é oramai usés a cerc inoms. Con n pue de inteligenza y bon sens pòn arjonje truep“, miena Pizzinini.

Al me plej(0)Al ne me plej nia(1)

770 iadesc liet