Toponomastica: cie ardiment

Sot a Durnwalder é la toponomastica gnuda trateda plu outes, mo an ne é nia ruvés anencef. Permó ti ultims agn de sia legislatura án laoré con plu scerieté ence da pert di talians che boicotova zenza vigni proposta che ne tigniva nia cont de duc i toponims

metus ju tl talian da Tolomei. Dl 2012 él nasciù na lege sun la toponomastica che ne parova nia damat. Ma contra chesta á l govern zentral fat recurs dant a la Court Costituzionala; chesta  ess dan puec dis audì da traté chest  problem, mo l  senatour Palermo á bloché dut, davia che al parova che la lege fossa gnuda refudeda. En San Matie ( 21.09.2016)  se á la Comiscion di 6 aposta abiné a Bulsan, mo ai á tizé legna verda che al é ju su n fum fosch y perchel messei tost endò se abiné  per aprové defin na norma de atuazion che dijará che na Comiscion paritetica dess ti fé les propostes a la provinzia per partorí la lege de toponomastica definitiva.

Al vegn rejoné de na  comiscion paritetica; paritetich vuel pu dì te Südtirol che vigni  grup mess avei raprejentanc unfat, zenza ne é na comiscion nia paritetica, mo che ala descrimineia l grup ladin. Mo rejoné án che al dess ruvé te chesta Comiscion  la medema cumpeida de  talians y de todesc, zenza ladins!!  An ne ará mine l ardiment da ignoré daldut l grup ladin che é l plu vedl de Tirol y  á i toponims plu vedli che mess gnì mantegnis inant! I ladins mess se fé avalei si derc pro la politica.