UNESCO: la senta auda chilò da nos

Al senatour beluneis dl PD, Maurizio Fistarol, ne ti plej la soluzion de na senta rodanta dla fondazion UNESCO Dolomites daldut ne nia. Al preia dassen che les istituzions beluneises y la region Venet sie a una y tegne ite na posizion unitara y sterscia. Aladò de sies paroles rìsien de descontenté duc tres na senta  rodanta da provinzia a provinzia. La provinzia de Belun – dìjel – pò a poura nia se ghiré la senta sun sie teritore, ajache 45% di raions metus sot a „sconanza“ UNESCO fej pert dla provinzia de Belun, plu souraspersa che vigni autra provinzia dles 5 a la pert. La provinzia de Belun dess – do sia minonga – propone na localité beluneisa che à tamben de bones poscibeltés de vegnì azeteda da les provinzies de Trent, Bulsan, Pordenon y Udin. Maurizio Fistarol, senatour beluneis (PD).

Sies ipoteses é l comun de Belun, y dantaldut Cortina d’Ampez che giaud de n prestije particolarmenter aut, fosc tamben Auronzo de Ciadoura che an à chirì fora per fé la festa de inclujion y ilò él ence les Trei Pizes de Lavarei, les pizes simbol dles Dolomites. Chestes é demé ciamò ipoteses. Ma Fistarol animeia bele sen les istituzions beluneises a jié ben con sies chertes deberieda con la region Venet. Cie che conta – dij l ex-ombolt de Belun – é che la senta sie te nosta provinzia.
Belun cartarà ence la cherta a livel nazional che la region Trentin-Sudtirol y les does provinzies de Bulsan y de Trent é bele „plenes de privilegs“ y ence per chest se „merita“ la „puera“ provinzia de Belun la venta, scasseda su te chisc ultims agn da na seria de referendums per mudazion de provinzia (Sovramonte, comuns ladins da souramont). L sciblament contra Durnwalder a Auronzo pro la festa de declarazion dles Dolomites a arpejon naturala dl’umanité ai 25 de aost, fova bonamenter vegnù su per chesta rejon, apeina che al à dit les prumes paroles per todesch.
Entratant à l alpinist di 8000, Reinhold Messner, proponù che la fondazion UNESCO tole su l inom ladin „Dolomites“, zenza mete permez Dolomiti (talian), Dolomiten (todesch) o Dolomitis (furlan), forma che corespon avisa a la dizion engleisa.

Al me plej(0)Al ne me plej nia(0)

691 iadesc liet