Valedes ladines: Erbhof dla Svp?

I ladins tla provinzia de Bulsan ne se fej nia valei si derc linguistics. Un di ultims ejempli: l assessorat ti à sourandé a paurs dla Val Badia de november 2009 endò blasons  y onoranzes con la scrita „Erbhof“ per todesch da taché su sun sie mesc/luech.

An tegn convegns a Bulsan sun la valuta dl lingaz ladin, ma tla realté pratica ne suzédel nia cis truep. L ladin vegn adoré tres demanco empede tres deplù. L raprejentant de Ladins Dolomites, Albert Pizzinini, se baudia de na todeschisazion che brancia tres plu encantourn tles valedes ladines.

„N valgugn fac  merita na reflescion plu sota. Pion via da les manifestazions organisedes di partis todesc te nostes valedes che vegn tegnudes te sie lingaz dla oma. I me aspetasse ben che chi che vuel ciafé nostes oujes litales emparassa nost lingaz. Penson a nost „Landeshauptmann“ che te 20 agn ne é sté bon da ne emparé nience una na parola de ladin. Sce i jon a Bulsan spo sonse duc a una da rejoné todesch con el, ma sce al vegn tles valedes ladines él dret se aspeté che al rejone ence ladin. Al se tratassa de n segn de respet per i ladins.
Dret desplajoul él ence che la generazion joena dla SVP p.ej. mane fora a les assoziazions de Santa Cristina n envit a n forum soura l davegnì dl paisc demé per todesch. O che ai se dauda da mané fora te nost lingaz dla oma o che ai se sent oramai todesc.
Sce i volon vegnì respetés dai autri ence politicamenter, spo messonse enstesc nes dè plu valuta. Al é cler che duc nes smileia enfin che ai adora nostes oujes, ma sciche i on tresfora vedù, tira mefun i enteresc di todesc y talians dagnora dant.
L ejempl di ejempli: ciodì ne pò pa nia n ladin nia deventé „Landeshauptmann“, sce al ne se declareia nia todesch? N fat nia azetabel che descrimineia i ladins, ma che vegn toleré!
N auter ejempl: les coutes che nos paion ite tles valades ladines y che ne ruva nience endour per n chert. Sce i ne revaluton nia nosta identité jiràla tres piec; penson medré soura deplù. Al joa a puech se dì ladins y dedò ti sauté do y ti dé la ousc a chi che ne respeteia nia nost lingaz“.

Albert Pizzinini, Ladins Dolomites

Al me plej(0)Al ne me plej nia(1)

703 iadesc liet