Valentin y Videsott

„Do les prescions fates da Ladins Dolomites à la jonta provinziala nominé ence n ladin sciche raprejentant dla Provinzia tla comiscion per la toponomastica“.

Chest dij l president de Ladins Dolomites (LD), Albert Pizzinini.
An é endere manco contenc che al sie gnù nominé Hugo Valentin che tolarà ite la luegia de Ferdinand Willeit canche al se tratarà de toponims ladins.

Tofles con toponims te Fascia. Dantaldut te Fascia él dutaorela n grumon de toponims demé per talian y al plu sotvia per ladin, depierpul che al messessa ester l contrar, n ciamp de intervent per la Lia di comuns Ladins.

Aladò de LD fòssel ju de uega da pert dla jonta Provinziala de deplù coraje. „Valentin é n vedl esponent de partì y dessegur nia n espert tl ciamp tla toponomastica. Logiches de partì messessa te chest caje romagne demez y an messessa chirì fora les persones aladò dles competenzes, cis te n ciamp tant zite sciche la toponomastica, olàche ala se trata dantaldut de chestions filologiches“, enscì descrìven i festidesc per la dezijion dla jonta de avei nominé Valentin.
Contenc ésen depierpul con la nomina dl president nuef dl Istitut Ladin Micurà de Rü tla persona de Albert Videsott, diretour dles scoles tla Val Badia: „Tres la nomina de n president nuef dl istitut cultural ladin déssel deventé n zenter dla cultura ladina; zenter independent dal podei de Bulsan. La cultura ladina ne dess nia vegnì influenzeda da les dezijions da Balsan sciche al é suzedù con l svilup dl ladin standard (LS) o ladin dolomitan che an dij“, se aoda LD. Ladins Dolomites ti fej les mioures aodanzes al president nuef, ti empermetan tresfora sostegn, vigni outa che al gnirà prescions da Bulsan che desturba sie laour de valuta.

Al me plej(0)Al ne me plej nia(1)

722 iadesc liet