Viva la Ladinia Unida!

En mercui, ai 14 de messel, él sté te Fascia la inaugurazion dl Comun General de Fascia. Te chest cheder à la Union di Ladins de Fascia envié dant a la senteda a na enconteda anter la UGLD y ombolc dla Ladinia.

Da Gherdeina y Badia ne él samben vegnù degugn. Ivan Lezuo, Tone Pollam y Marco Pizzinini à tegnù de curtes relazions, Silvano Ploner, president dla Union di ladins de Fascia à condut la enconteda y Elsa Zardini y la procuradoura dl Comun General de Fascia, Cristina Donei y l assessour Luigi Chiocchetti à porté i saluc.
Les paroles dl vize-president dla Generela Marco Pizzinini:
Stimedes autorités, stimeda jent de Fascia. Chest da encuei é varamenter n dì storich nia demé per vosta comunité, ma ence n de storich por düc i ladins dles Dolomites y per me personalmenter él na gran onour da ester chilò. Ai 14 de messé dl 1946 se damanova Sisto Ghedina y Guido Iori Rocia adum a 3000 ladins vegnus adalerch sun l Jouf dl Sela da dutes les valedes, na “aministrazion autonoma per les valades ladines” y encuei, 64 agn dedò pòn dì   che la comunité de Fascia é chela comunité ladina che ti é ruveda l plu damprò a chest travert con l´istituzion dl “Comun General de Fascia”. Al é per me perchel n gran plajei da Ves porté l salut dla UGLD (Union Generela di Ladins dles Dolomites) y ie volesse me congratulé con duc chi che à colaboré per arjonje chest:
– da una na pert i raprejentanc politics de Fascia, che é stés bogn da laoré fora y da porté inant con consecuenza n projet politich che ti dà gran autonomia a vosta valeda,
– da l’autra pert ence i politics y i raprejentanc dla Provinzia de Trent che à tout su  y à azeté chest projet, no con la tema da perde influs, ma con gran longia veduda de chi che à capí che la “sussidiarité” é dagnora steda l pont de forza de na bona aministrazion de noc raions da mont.
Al sarà dessegur d’autri che rejonarà sun l’emportanza de chest dì y dl “Comun General” per vosta comunité, ie volesse perchel demé fé n valgunes consciderazions {xtypo_quote_right}Ombolc de Fascia, Procuradoura generala, dedi na sburla a la Lia di Comuns Ladins!! Al é gran ora da ti dé respostes cleres a les ghiranzes fondamentales de duta nosta mendranza. Zachei mess tré l ciar. Vos eis l’autonomia per l fé!{/xtypo_quote_right}sun l’emportanza de chest dì per i autri ladinsd dles Dolomites:
– Fascia é sen la valeda ladina che à la plu gran autonomia!! Ie spere che i raprejentanc politics fascians, i ombolc y la Procuradoura dl Comun General anuzeie chesta autonomia ence inant per daidé i autri ladins che n’é nia ciamò ruvés tant inant.
– Pe i ladins de Fodom y de Anpezo é sté l sostegn fascian te chisc ultims agn fondamental per arjonje almanco chel puech che ei á arjont. De front a chisc ladins ne s’à Fascia nia comporté desche l rich avaron che dà demé ca les “fregoles”, ma desche l fré plu vedl, che veid i debujegns di autri y che  à sapù da partí. Per i ladins da souramont él fondamental che chesta “generosité” fasciana vae inant.
– Chesta autonomia nueva dess Fascia ence adoré per strenje ciamò deplù i liams interladins:
– Ombolc de Fascia, Procuradoura Generela, dedi na sburla a la Lia di Comuns Ladins!! Al é gran ora da ti dé respostes cleres a les ghiranzes fondamentales de duta nosta mendranza. Zachei mess tré l ciar. Vos eis l’autonomia per l fé!
– Daidedenes ence inant con l liam linguistich interladin con la promozion dal Ladin Dolomitan! Zenza n lingaz de scritura per duc i ladins ne sarà i ladins mai un n popul, ma dagnora demé de piceres comunités spidicedes su che mess tò su passivamenter duc i influsc che vegn da defora.
– Y a la fin, stimés raprejentanc de Fascia daidede la Union Generela sun sie troi dla reunificazion di Ladins dles Dolomites daite dai confins dla Region Trentin-Südtirol! Cheriede te vostes comunités, te vost Comun General y ence a Trent n clima anter la popolazion y la politica che  é a una con chest gran projet storich, con chest gran travert, te chel che l Comun General de Fascia ciafassa sie compliment plu bel. Con chest Ves diji n bel „die vel paie“!, per dut cie che i raprejentanc dla Val de Fascia y i raprejentanc dla provinzia te Trent fej per l’UGLD y per duta nosta mendranza.
Viva l Comun General de Fascia, viva i ladins dles Dolomites, viva la LADINIA UNIDA!!!

Al me plej(0)Al ne me plej nia(2)

1086 iadesc liet