Zitadinanza dopla … i on d’autri problems

La SVP y sen tamben la SVP ladina se dà ju con la zitadinanza dopla taliana-austriaca per la jent o miec demé per na pert te Südtirol.

Da pert dla Austria se àla bele ciafé la porta aridleda. Albert Pizzinini tol posizion sun chesta chestion. Sen él ence da se aspeté reazions da Roma. An dess se recordé che Roma à bele agaié l budget provinzial de Südtirol de passa 300 milions de euro (ca. 6%), ence sce nost bon pere Durnwalder seghita da dì che i on pa ciafé truepes competenzes en plu, desmentian endere la seconda pert che les competenzes costa desche an veid pro les stredes.

Y chilò  seghita Mussner a volei mete n daz sun i joufs de Frera y de Sela per despartì  i ladins, che aladò dla SVP é demé “trei gialuc” da splumé y da ti brancé sot tl tacuin. Ma che al é “ladins” che se proa tant dassen da ti brancé tles gofes a d’autri ladins ne é nia da creie. Ma la chestion dl daz sun Frera y Sela ascon valch d’auter. Sciche duc sà ne nes végnela nia conteda endertura. Per les stredes armàngorel i dinés y an mess tré ite plu scioldi; do i joufs de Frera y Sela vegniràl bonamenter metù ite de autres stredes a paiament; ne nes fajon demé nia de gran ilujions. I bujons sun les stredes tles valedes ladines desmostra dut chest. Tost messarà paié i comuns y la provinzia i danns ai auti y a les persones per les scletiscimes condizions dles stredes. De chest vers él plu sentenzes dla Cassazion.

Ma empò  impede se cruzié de fé les cosses sciche al auda, vàn inant sun chesta streda. Te Südtriol él 15% dles persones che viv tla pecugna, ma per l sozial végnel fat tres demanco. La popolazion de dut Südtirol y i ladins vuel la verité y no baujies che vegn contedes encantourn per se fé si enteresc.

{xtypo_quote_left}La discuscion soura la zitadinanza dopla taliana-austriaca ne à nience desclarì la situazion di ladins da Souramont. {/xtypo_quote_left}Vijions é ester bogn da garantì na ecuité soziala, zenza ingiustizies olàche duc vegn tratés a la medema maniera, olàche chi che resta endour vegn daidés, no ti sauté do a na zitadinanza dopla che conduj demé a complicazions y problems giuridics. La SVP ne nes dij nia ciunes che é les conseguenzes dla zitadinanza dopla, na zitadinanza é ence lieda a doveis. En plu ne él nia l caje de tré ca danuef les plaies dles opzions.
La discuscion soura la zitadinanza dopla taliana-austriaca ne à nience desclarì la situazion di ladins da Souramont. Sce les rejons per ciafé la zitadinanza dopla é cheles dla pertegnenza a l’Austria dant da la pruma vera mondiala spo reverda chest duc i ladins: badioc, gherdeines, ampezans, fascians,  fodoms y coleisc, zenza ne féjen nia auter che ester a una con la tripartizion fascista.

Ciamò n iade BASTAN y pensede ai problems concrec y no a brancé tres tl tacuin.

Albert Pizzinini, Ladins Dolomites

{jcomments on}

Al me plej(0)Al ne me plej nia(0)

709 iadesc liet